高海寧黎諾懿濕身激咀冰火驅寒
藝人高海寧（高Ling）與黎諾懿日前深夜拍攝新劇一場淋雨戲，高Ling因用錯方法包保鮮紙，保暖失效反而變得更凍！二人其後跑入車廂拍咀戲，冰火交融才可抵禦寒冷。
高海寧日前於中環與黎諾懿拍攝無綫新劇《BB來了》，劇情講述飾演調酒師的高Ling與黃長興鬧交後離開，黎諾懿即時尾隨，在滂沱大雨下上前安慰她。當晚氣溫只有十多度，但二人被冰水照頭淋，當拍完第一Take後，黎諾懿即時忍不住大叫：「好凍呀！」濕透的高Ling更透出黑Bra。
代人夫向老婆備案
拍完淋雨戲，二人再緊接拍攝另一場於車廂的咀戲，高Ling表示今次較於《愛·回家》中的咀戲激，但因大家相熟，加上事前已傾好，所以沒有尷尬，一Take過搞掂，寒夜中能躲在車廂相擁拍咀戲，令原本冷得騰騰震的二人都因相擁而變得溫暖。二人相擁咀嘴，有家室的黎諾懿笑言高Ling會代他向太太備案，而高Ling亦指黎諾懿的老婆明白事理。
包保鮮紙入水更凍
事後他倆接受訪問時，均表示凍到打冷震，黎諾懿說：「我好少會嗌凍，但拍到中段震晒，啲水真係好冰凍！」笑言曾想放棄，但慶幸不是天氣更寒冷時才拍攝。高Ling稱當時只想盡快完成拍攝。每逢停機時，工作人員即遞上熱茶、暖包及毛巾等供二人取暖。高Ling及黎諾懿即時走到暖風機前取暖，黎諾懿稱曾於冬天到橫店拍戲，因將手放近暖風機取暖，翌日發覺被灼傷，提醒高Ling不要放得太近。高Ling則透露全身包着保鮮紙，但因「雨勢」太大，發覺原來沒有太大作用：「我冇乜經驗，將保鮮紙分成幾段嚟包，原來要一氣呵成包先得，我拍到中途啲水流入皮膚更加凍，拍完嗰場要重新包過。」
文：影視祖