李美琪走鹽加糖懶人版番茄炒蛋

Monnie在「大家樂特約」《星級煮意》示範懶人版「番茄炒蛋」，她指番茄炒蛋是每個家庭必備菜式，做法與材料簡單，但相信每個人都有不同烹調方法，味道亦各有不同：「我呢個係Monnie版嘅，亦係懶人版本，材料好簡單，只係番茄同蛋，比例係五個番茄、四隻蛋。至於調味料方面，如果大家冇煮開餸，只要去快餐店攞一包番茄醬同一包砂糖就搞掂。」

酸酸甜甜更開胃

Monnie分享小貼士，叮囑煮番茄時記得要加入砂糖：「因為落完白砂糖之後番茄嘅鮮甜味會更加突出，食落去酸酸甜甜嘅感覺，更加開胃。我因為要減肥，所以我係冇落鹽，因為鹽係好肥，如果唔使減肥，可以落鹽，煮出嚟個味就會更加豐富。」拿起鑊剷的Monnie有姿勢有實際，她解釋因由細到大都喜歡玩煮飯仔：「細細個時，爸爸會抱我企喺廚房嘅洗衣機上面睇住佢煮餸，到大個咗，自己喺出面餐廳食到好味嘅菜式，就會買材料返屋企研究吓，睇吓可唔可以煮到相近嘅味道。」

先將番茄切件。	雞蛋打勻成蛋漿炒熟撈起備用。	煮番茄時要加入砂糖。

吳綺莉：煮耐啲更多汁

「廚媽」吳綺莉對於Monnie的煮法有建議，認為不應太早落雞蛋：「蛋可以兜一兜，撈起之後備用，再煮番茄，番茄可以煮得耐少少，等番茄腍啲先加蛋落去，蛋就唔會咁老，而且番茄煮耐少少會有汁，加埋茄醬，就會變得好Juicy，大家不妨試吓。」

炒蛋回鑊與番茄同煮。	製成品 番茄炒蛋	李美琪教路去快餐店攞番茄醬同砂糖。

《星級煮意》先後邀得陶大宇、黃建東、陳嘉桓、陸浩明與女友、陳嘉佳、朱慧敏等亮相，其他名人藝人會陸續登場示範不同菜式，又有專家提供煮食要訣，娛樂與資訊並重，大家可透過東網App或東網網頁收看及隨時重溫。

文：名人組