薛凱琪向藥物Say No打坐解憂
歌手薛凱琪（Fiona）是行內數一數二最勤力的女藝人，歌影視三棲的她近年成立個人服裝品牌，每日僅休息數小時，Fiona自爆早前要借助安眠藥入睡，長期服藥的她醒覺藥物傷身，最後改以打坐來解決失眠，她說：「打咗坐令我應付到好多工作。」
薛凱琪有個花名叫「鐵人28」，因她一年只放一星期假，其餘時間全是工作，連她的經理人都讚她勤力如牛。自加盟太陽娛樂歌影視三棲發展，Fiona工作接踵而來，劇集、電影一套接一套，近年為圓夢成立個人服裝品牌，又要拍網劇的Fiona開始為國語新歌及服裝品牌宣傳，惟有犧牲休息時間，不停與服裝設計師開會。
一日瞓得幾粒鐘
Fiona透露每件衫的剪裁及物料都有份參與：「一年花好多個鐘頭開會，比預料之中需要用嘅時間多。（你幾耐冇放假？）8月後就冇放過，一日真係得幾個鐘瞓。」隨即大讚打坐的好處：「依家一唔舒服同攰就打坐，愈攰愈瞓唔到，以前會食安眠藥，食到得番輕微作用，試過一晚食兩粒，知道真係好傷身，所以決定戒安眠藥，嘗試打坐，之後令我應付到好多工作同埋冇咁攰，喺屋企、保母車同片場都會打坐。」
唔擔心變老姑婆
女強人Fiona坦言不擔心會成為老姑婆：「如果啲男仔覺得我強、做嘢能幹而唔敢愛我，咁嗰個唔係我需要愛嘅男人，我接受到窮過我嘅，就算小本經營生意，佢都可以係我心目中英雄！」單身多時的她直認過去半年都冇人追，她說：「都想有個膊頭挨吓，以前嘅我覺得冇呢個膊頭就會好慘，依家嘅我個心強咗，一個人開心同唔開心唔係人哋畀你，係靠自己。（唔怕變老姑婆？）唔會亦唔擔心，完全有信心。」又說過去多段感情都認真對待，Fiona強調從來冇呃過男人：「咁大個女未試過一腳踏兩船，相信愛情路上，上天會眷顧我。」
文：音樂組
服裝：SPIRITUNUS