健身減壓人又弗姜麗文影響老爸動起來
藝人姜麗文（Lesley）自小熱愛運動，近年更愛上健身，擁有Fit爆Body的她坦言做藝人壓力大，全靠運動才可以走出困局，就連72歲的爸爸秦沛亦受她影響，同樣喜歡「動起來」，更拍下運動短片傳給愛女欣賞，成為父女聯繫感情的最好方法！
大騷纖腰的Lesley於健身室做出多組高難度動作，她指運動能令她感覺平靜：「我個腦係好嘈嘅，就算睇緊戲都會諗緊嘢，惟有做緊運動先會覺得好靜，好舒服好好玩！」
細細個有馬甲線
自小已喜歡運動的她，直認小學時期已擁有馬甲線：「我係天生不嬲有少少線，但有肥肉就會冇咗，大個開始減肥冇咁水腫，食清啲、戒飲汽水同煎炸嘢，跟住啲線就出番嚟！」不過得天獨厚的Lesley自爆試過「肥胖」的滋味：「係中學同大學嘅時候，所以我先有依家個Pat Pat，我身高1米6，依家105磅，以前有113磅，係Baby Fat。」
維繫父女關係
做藝人壓力大，Lesley表示是運動拯救了她：「我31歲喇，試過有好多壓力，容易唔開心，會覺得好攰唔想出街，呢啲嘢一次過嚟晒，壓力太大嘅時候成日都喊，情緒好唔平衡，呢刻可能笑緊，但5秒後就會喊，做運動最大嘅變化係開心咗 。」最令她開心的是爸爸秦沛亦受到影響：「我72歲嘅爸爸似27歲，好鍾意做運動，最近佢不停拍嘢，一個月前佢Message我，話受我影響，佢喺內地每朝早拍完嘢就會Send番條做運動嘅片畀我睇，好開心爸爸做番運動。」運動成為兩父女的共同話題，更有助維繫父女情。
文：專案組
攝：劉斌
場地：Fight Hard Fitness