Jackson連環攬女問候粉絲個Pat
韓國人氣男團GOT7的香港成員Jackson昨日在apm舉行粉絲見面會，首次單拖在香港會粉絲的他，吸引近400粉絲圍觀，逼爆商場各層，更連環與女粉絲抱抱，又搞笑問候晨早到場排隊的粉絲：「小心屁股怕凍！」而他更獲媽咪同好友捧場！
身穿豹紋恤衫的Jackson甫登場，現場立即傳出震耳欲聾的尖叫聲，Jackson亦興奮大叫：「Hi！我係Jackson王嘉爾！」提到不少粉絲昨晨9點已到場霸位，Jackson立即多謝粉絲，又搞笑地問候：「你哋排隊時係咪坐地下，有冇墊住嚟坐？小心屁股怕凍！」聖誕節將至，他笑言聖誕的難忘回憶是陪媽咪去Shopping，因聖誕有大減價，又笑言在香港行街好方便，因為沒人認識他，故希望明年能多回港活動。其後Jackson向上層粉絲打招呼，期間有粉絲將Jackson母校的T-shirt拋下台，他亦興奮地接下並拿着影相。
男女通殺
Jackson與粉絲玩遊戲時，賣口乖讚粉絲可愛及性感，又識做地逐一同粉絲抱抱，更與粉絲做出心形甫士，令台下粉絲妒忌尖叫，及後又與主持林柏希上演從後抱做心心甫士，十分爆笑！期間Jackson與台下粉絲互動：「食咗飯未？今日唔係返學咩？記住睇完騷之後要做功課，如果唔係畀阿爸阿媽鬧。」
阿媽冇催婚
Jackson之後換上運動衫演唱Solo歌曲《Papillon》，演出後熱爆除下外套，只着背心晒肌。受訪時被問到在活動上狂攬粉絲，會否驚媽咪嬲？他笑指：「愛我嘅人，我應該要愛番佢（粉絲），阿媽唔會嬲啦，佢都冇催我，阿哥都結咗婚啦！（唔係更加會催你咩？）依家連女朋友都冇，連瞓覺時間都冇，等我工作搞得掂，自己照顧到先至諗。（怕唔怕到時年紀好大？）咁又唔會等到80歲嘅！」問會否想回港拍戲？他指有機會當然想拍，但比起偶像劇更想拍武打片、動作片及警察片，又謂從小就喜歡鄧麗欣、鍾嘉欣和Twins，但謙虛地指自己還是新人，對方未必想與他合作。
文：外娛組