朱晨麗30歲壽星驚喜收「兵」！
藝人朱晨麗（朱朱）近日忙於拍攝無綫新劇《兄弟》，連日前30歲生日也要在工作中度過，幸而獲一班窩心的劇組人員，在外景場地為朱朱舉行神秘派對，還準備了三個蛋糕，令壽星女驚喜非常，她說：「啲劇組同事可能日日對住啲演員開工，個個都好入戲，事前我完全Sense唔到。」
當天朱朱緊接返電視城開工，又獲兩名粉絲穿上Minions（迷你兵團）人形公仔衫、並拎住蛋糕為她賀壽，朱朱見狀即忍不住大叫，更走上前肉緊攬實公仔，她說：「粉絲知我好鍾意Minions，估唔到佢哋會扮埋，大街大巷咁走出嚟，好可愛呀！真係好開心，多謝晒佢哋。（生日冇得慶祝？）食餐飯都可以嘅，所以我歡迎大家約我食生日飯o架！」
