麥明詩被網民寸抽水委屈眼濕濕

麥明詩前晚在社交網自爆早年參加內地交流團時曾遭性侵犯，引起網上熱議，有網民予以同情，亦有網民覺得她抽水，更有人質疑她「性侵犯」的定義，懷疑她只是被摸手仔或性騷擾：「如果真係請去報警而唔係網上高調地點#metoo，依家已經變咗好似冰桶遊戲開始喺FB蔓延。」昨晨明詩在網上再發長文，引用其法律知識解釋如何介定「性騷擾、非禮、性侵犯、強姦」。

嘆不能隨便講性話題

昨午明詩一臉憔悴返電視城拍劇《是咁的，法官閣下》，她否認因公開事件致壓力太大而失眠，指一直獲家人支持，當年返港後亦有到警署備案落口供：「但因為件事唔喺香港發生，所以冇實質行動做到。（網民質疑點解唔喺內地報案？）我嗰陣好細個，一心想盡快返香港，擔心要喺內地留好耐。」此時她眼眶通紅，眼濕濕哽咽說：「諗番轉頭，究竟可唔可以做番一啲嘢？但依家再諗都冇意思。」

對於被指有抽水之嫌，她稱只是想作出正面影響教育大眾：「我冇特別去講詳情同埋嗰個人背景，就係唔想網絡公審，只係想帶出呢啲事唔係大家想像中咁少發生。有人會斟酌係性侵定係非禮，或者因為我係讀法律，自己睇法同大眾唔一樣，非禮同性侵都係嚴重罪行，最高會判坐監十年，非禮同性侵都係猥褻侵犯，自己都好想推廣一下，希望法律知識普及化。（被指抽水，有冇覺得委屈？）有少少詫異，點解將經歷講出嚟，會畀人話抽水！原來性話題喺呢個社會仲係唔能夠隨便講！（想喊？）自己嘅情緒係用喺拍劇。」至於她曾指侵犯者是香港人，問到會否考慮詳細交代事件及繼續追究？她表示當時有研究，但覺得難以追究：「依家都因為時間問題，呈堂證據會有影響。」

掙扎不果留陰影

問到有否因性侵事件留下陰影？明詩直言因有暴力成分，曾掙扎但不成功，印象很深刻：「總之之後遇到呢啲情況，會識得保護自己，有學自衞術保護自己。」

文：影視組