半粒鐘搞掂！陳庭欣打拳操Fit「波地」
港姐出身的陳庭欣（Toby）對身形有要求，近年迷上Thai Boxing及Fitness以「強身健體」：「我唔特別鍾意跑步，打波就覺得成日要約腳先得，但打拳嘅話幾時玩都得，仲可以令自己體能好啲，即使突然間要做啲高難度動作以應付拍戲或台慶演出，都有一定幫助。」
Toby自言接觸泰拳已有好幾年，每次上堂操足一粒鐘：「半個鐘打拳、半個鐘做啲收腰、練馬甲線嘅動作，如果嗰排要拍啲會騷吓Body嘅節目，真係要努力咁去操弗。」又指打拳時十分小心：「冇試過大傷，通常都只係撞瘀隻腳咁。」對於有人以節食收身，她大力反對：「唔需要唔食嘢嘅！冇晒氣力心情又差。我建議大家去搵一樣自己鍾意嘅運動，如果唔係做幾次就會放棄，仲有千祈唔好臨急抱佛腳，諗住到夏天先嚟減，欲速則不達，做運動要持之以恒。」
