張美妮向大廚偷師慰老公
聖誕節快到，張美妮日前到老公開設的第二間餐廳布置一番，雖然老公一直錫住她，想她專心在家做幸福少奶奶，但美妮卻希望老公有個溫暖的家，跟大廚學煮聖誕大餐，一於炮製聖誕大餐給家人品嘗！
藝人張美妮與老公KK（黃偉強）結婚4年，過着幸福少奶奶生活，雖然她不時參與無綫綜藝節目及拍攝劇集，但因老公忙於做生意，身為賢內助的她都希望幫老公手。他們繼在沙田開設餐廳後，最近亦投資七位數字於天水圍大型商場再開餐廳，現時她暫停手頭上的工作，到餐廳幫老公打理生意，日前更到餐廳親手布置一番，配合聖誕節的來臨。
落餐廳親手布置
美妮受訪時坦言老公KK幾個月來忙於籌備餐廳事宜，相當辛苦，問到她如何協助老公時，美妮說：「我依家放假，盡量畀一個溫暖感覺嘅家佢，雖然屋企有工人，但我都會親自下廚或煲個靚湯等老公返嚟飲。」美妮又承認有興趣做生意：「我同老公講過，不如畀我去餐廳幫手，點知佢叫我咪搞。（想你專注做少奶奶？）可能係啦！佢都想我多啲時間喺屋企，唔好咁辛苦，但我始終對幕前工作有興趣，唔會停晒，呢兩年會盡量做少啲，休息吓！（趕住生B？）都係，我哋都好鍾意小朋友，努力緊。」
減工作趕生BB
由於忙於餐廳生意，聖誕節亦未能外遊，但美妮已計劃在家煮聖誕大餐，一家人過一個溫暖的聖誕節！訪問當日，她更入廚房跟餐廳大廚學整聖誕菜式，笑言：「之前我成日煮龍蝦意粉畀老公食，老公啲朋友食過都話好好食。我又幾鍾意飲紅酒、白酒，試過有一次煮海鮮意粉落白酒，自己煮吓飲吓，煮完之後就醉醉哋，跟住瞓咗，諗番都好笑！」
場地：Comma
攝影：劉斌
文：影視組