王君馨接造人柯打孭起七代重擔
人妻王君馨（Grace）昨日以弗爆校服Look現身劇集宣傳，盡現玲瓏浮凸身段，她透露老公為七代單傳，長輩想快點抱孫，但夫婦卻事業心重兼正享受二人世界，故心情相當矛盾。而帶住11個月大囝囝亮相的陳敏之，則表示待囝囝入學便會再次展開造人大計。
藝人王君馨、陳敏之、沈震軒等昨日出席無綫劇集《性在有情》宣傳，身穿貼身校服的Grace及敏之上圍十分豐滿，又大騷長腿，吸睛度十足！期間沈震軒及阮兆祥更化身BB，一眾演員輪住為他們裝身，場面有趣。
事業心重恨做打女
Grace盡顯玲瓏浮凸身材，笑指眼見哺乳期的敏之，亦開始擔心日後當媽時的身形會如何，故趁現時未懷孕勤力做Gym操弗自己，席間Grace又抱住BB把玩，一臉慈母模樣。談到劇中演性上癮英文老師，當中不乏性感場面，問到會否擔心因限奶令刪剪場口？Grace說：「係喎！唔知會唔會加塊布遮住呢？」問到何時實行生仔大計？Grace坦言大感矛盾，指日前感恩節返美國探望老公家人，老公的嫲嫲指孫仔乃七代唯一男丁，故生仔一事全靠他們，令Grace大感壓力：「好在老公父母就話仔女唔緊要，咁我如果生仔先，個心會定啲，嫲嫲就梗係想抱孫，不過老公就冇畀壓力我，但依家我哋事業都好好，呢啲就順其自然，想過吓二人世界，我又想做打女，到時生咗就會自己湊番。」
陳敏之聖誕留港搞P
而敏之則透露聖誕將留港為囝囝慶祝一歲生日，她說：「依家準備緊，到時個派對背景會布置成馬戲團咁，阿仔好鍾意動物，但未知到時同佢點打扮。（再追個女?）都想，但想個仔入學先。」
文：影視組