鄧月平爭獎突圍性感自作業

樂壇新人鄧月平（Larine）、顏卓靈及劉敬雯等昨日出席新人活動，獲鄭欣宜、鄭融等前輩到場打氣，眾人輪流上台表演。身穿粉色露肩裙的Larine全場最性感，問到是否想突圍而出？她笑言：「除咗性感，我唔係全場最粉嗰個咩？不過唱歌唔關性感事，最近我自己整衫，喺深水埗買布同買咗人形Model，如果頒獎禮前整得切就會着自己整嘅衫出嚟，依家整咗9成。」她預告戰衣會是花花露背晚裝，問可會露事業線？她說：「唔多唔少有少少嘅，但留番拍戲會好啲，唱歌露得太多凍親開唔到聲就大鑊。」又謂着住親自縫製的衫參加頒獎禮，就算沒得獎都開心。

開心左腳勁瘦

至於早前跌斷腳的欣宜撐住拐杖到場，左腳打石膏的她影相時得戚示範不用拐杖都企到，表演時獲大會安排坐在台前唱歌，唱得興起更站起來。打了一個月石膏的她開心表示前日終拆了石膏，現時換上「空氣石膏」，要穿兩至三星期，前日亦開始做物理治療。她笑言見到左腳瘦了很多：「因為肌肉耐唔用會收縮，我最瘦嘅時候隻腳都冇咁瘦。」又表示傷口已拆線，見到傷口有一大撻瘀，問到可有疤痕？她謂外側打直的傷口約4、5吋，內側打橫的約2吋：「唔係好深色，埋得幾靚，冇凸起。（遲啲諗住紋身遮傷口？）我有諗過呀，但睇吓點先啦，疤痕唔明顯就唔使搞。」

顏卓靈（右）與劉敬雯老友鬼鬼。

撐拐杖的欣宜左腳換上「空氣石膏」。

自爆成日爆粗

講到之前與好友許廷鏗直播打機，網友見到地下很多煙頭，欣宜表示因成班朋友在場，問到她是否不吸煙？她說：「我呢排唔想接觸太多煙、酒、咖啡。」講到她在片段中爆粗，她坦言經常都講英文粗口，覺得粗口不牽涉到他人就沒所謂。

文：音樂組　

攝：唐豁莊