麥家琪落敗老公嘲抵死!

藝人麥家琪前晚觀賞MMA格鬥比賽,自爆老公早前在她打輸比賽後,竟落井下石恥笑她「抵死」及「一睇就知唔會贏」,令家琪信心大跌,連本來一周打三次泰拳也暫時放棄,陰功豬!

麥家琪、麥紫莉等前晚到灣仔欣賞ViuTV《G-1格鬥會II》決賽,賽事由余智嘉對何慈茵,何慈茵首回合已打到對手流鼻血,余智嘉之後雖嘗試以鎖技箝制對手,但未能挽回劣勢,結果何慈茵勝出。

再搵佢打都唔制

月前已被淘汰的家琪,前晚一樣睇得肉緊,她說:「我之前喺日本打輸咗,啲傷到依家都未復原,以前我一星期打三次泰拳,依家停咗,只係跑步,我要再抖吓先,MMA真係唔容易!(老公呵番?)佢唔止冇呵我,仲笑我,話我抵死!一睇就知我唔會贏,事實係對手太專業,身形高又轉身快,下次再搵我打,我都唔制,留番畀啲專業打啦!」

麥紫莉亦自爆傷勢未愈,左腳韌帶在比賽中受傷,仍要做物理治療,她說:「醫生都講唔到我幾時可以完全好番。(有冇男仔大獻殷勤?)所有朋友都好照顧我,我都有趁呢段休養時間去學美容、化妝增值自己,同埋做啲散Job咁!」

何慈茵獲勝要慶祝

出爐「拳后」何慈茵捧着冠軍腰帶受訪,她說:「贏到比賽好開心,鬆咗口氣,會同爹哋食飯慶祝!(你打到對手流鼻血?)我面同嘴都中拳,好在唔算好嚴重,對手身高有優勢,我更加要出拳準啲!嚟緊都會喺MMA繼續發展,因為今次對手比我重,我都可以勝出,教練都話我有天分。」

文:影視組