惠英紅再下一城攞埋新加坡視后

惠英紅剛憑電影《血觀音》首次奪得台灣金馬獎影后殊榮，前日再下一城，憑電台劇集《人間有情之苦瓜的味道》勇奪「第二十二屆亞洲電視大獎2017」的「最佳女主角」，殺埋入電視圈初嘗視后滋味！頒獎典禮在新加坡舉行，今次惠英紅要面對六位強勁的對手，包括日劇天后篠原涼子、台灣視后柯佳嬿及新加坡視后鄭惠玉等，最終她憑「映姐」一角，在劇中大爆發兼催淚的演出，殺出重圍，首奪視后。

唔得閒興奮

不過惠英紅卻因為工作關係，未能親身領獎，昨日她接受電話訪問說：「喺香港拍緊戲，冇時間去現場，呢套劇自己好鍾意，覺得自己真係做得好好，都好開心。（心情如何？）冇時間興奮，因為開緊工拍感情戲，知道嗰陣咪『哦』咁樣囉！」而視帝則由台灣男星蔡振南憑劇集《媽媽不見了》奪得。

惠英紅在劇中演技大爆發。

歐陽震華獲頒「最佳喜劇演員」，他答謝太太支持。

除惠英紅為港爭光，歐陽震華亦憑無綫劇《一屋老友記》捧走「最佳喜劇演員」，今次八人入圍名單，只有他是唯一非新加坡代表，能揮低七位本地薑的他在台上坦言新加坡是福地，去年亦憑《一》劇奪「星和無綫電視大獎2016」的「我最愛TVB電視男角色獎」，更不忘大講愛的宣言多謝太太傅潔嫻，指太太從未罵過他，而憑網上直播分享喜悅的傅潔嫻亦在微博留言「實至名歸」。至於洪永城主持的無綫節目《五個小孩的大叔》奪得「最佳兒童節目」。

「喜劇拎獎專業啲」

昨日已從新加坡返港的歐陽震華受訪說：「今年又拍劇又拎獎，都算大豐收，有獎攞有飯開，依家《誇世代》收視又好。（太太冇鬧過你令人羨慕？）我都係講笑，頒獎禮啲人唔係好聽得明廣東話，我講國語又麻麻。」他又說：「憑喜劇衝出香港，喜劇拎獎都專業啲，你睇專科醫生都貴啲啦！喜劇要有番咁上下資歷先做到，TVB應該要加番個喜劇主角獎，因為都好多做喜劇好叻嘅演員，好似朱咪咪、許紹雄等。（繼續行喜劇路線？）冇辦法，依家對號入座，氹人開心自己都開心。」

採：影視組　

文：專案組