杜汶澤Sex於微時 感激一夜情人送暖
藝人杜汶澤前晚出席座談會時，自揭婚前有一夜情經驗，更會隨身袋住安全套。他又自爆曾在街上巧遇「Sex於微時」的伴侶，令他感覺溫暖。而田蕊妮在網上留言，感激人生中遇到老公杜汶澤，大晒幸福。
杜汶澤前晚以嘉賓身份出席關懷愛滋座談會，談及當年加入亞洲電視時的放任生活。閱女無數的他周圍識女仔，兼有一夜情經驗：「嗰時做亞視冇出路，又覺得自己一世唔會紅，點知就年年都選亞姐，嗰陣會幫手，夜晚收工又同啲副導演去食飯識女仔。（試過一夜情？）基本嘢，嗰時我銀包長期袋住一個安全套。」
與「舊愛」子女合照
阿澤表示當時瞓醒起身，身旁總會有一個女仔，並自爆婚後試過在街上重遇其中一位一夜情對象。他說：「佢當時同小朋友一齊，我覺得好Warm，話晒我喺亞視年代好低微，佢都肯安慰我，明白咩叫一夜夫妻百夜恩，『Sex於微時』，雪中送暖！」阿澤又指兩人相認後，大方與女方的子女合照留念。問到女方的丈夫可有在場？他笑言：「可以話係影迷嚟嘅啫！」
讚森美好人
另外，田蕊妮前晚於社交網讚森美看到阿澤好的一面，並指遇到杜汶澤令她幸福：「我的好是因為他的好。」阿澤對此表示森美好人之餘，又不介意外間的看法：「我咁複雜，唔了解我唔出奇，其實個個人都好複雜！啲人成日覺得做藝人講嘢要夠體面，要得體啲，你估選港姐咩？我都40幾歲，仲改嚟做乜？」
文：專案組