徐天佑畀面老婆同舊愛斷交

徐天佑、陳欣妍（Shirley）、黎美言與黃建東日前到尖沙咀一間餐廳為電影進行補戲，劇情講述天佑與女友Shirley食飯時碰到他的初戀情人Winkie，天佑竟冷落女友與Winkie興奮談拍拖往事，嬲得Shirley一手將巨型豬手質向Winkie！

天佑笑言現實中不會發生類似情況，絕對會畀足面太太：「以前撞番舊愛會尷尬，寧願避開唔見，依家大咗就覺得冇所謂，但都唔會同舊愛特別好傾，收斂啲畀番面老婆！（試過畀女爭？）冇呀！我專一嘅！我個人比較遲鈍，就算有異性對我有意思，我只會當係朋友。」Shirley則自言不會唔識趣撩有另一半的男士，更加不會做第三者：「反而試過有人介入，我唔會原諒，祝福佢囉！就算個男仔返轉頭都唔接受，已經Hurt咗。」

徐天佑與「舊愛」黎美言重遇係咁傾又餵嘢食，他坦言現實中唔敢咁做。	「正印」陳欣妍發火，出「手」趕情敵黎美言。	徐天佑（左起）、陳欣妍、黎美言與黃建東到餐廳為電影補戲。

Winkie爭仔次次都贏

至於近年建立打女形象的Winkie片中飾演「女神」，自嘲很久沒有如此「女仔」：「睇劇本要講啲好嗲嘅對白，我睇完都笑咗！惟有諗番以前對住男友小鳥依人嘅感覺。」她又表示不會爭仔，過去即使有第三者介入，一樣箍得住男友：「如果佢覺得冇咗你唔得嘅話，就唔會接受引誘。」但直言最難忘的失戀是在十年前：「我喺街度喊到死人冧樓，朋友拖住條屍咁拖我走！頭幾個月真係好難捱，要兩、三年先振作番。」

此外，天佑透露最近為電影狂減磅，兩周內激減逾十磅，又做Gym做到嘔，營養師告誡他隨時猝死，天佑即注意飲食以健康方法減肥。

文：影視組