張達明帶路「夜蒲」陶枳樽醉遊西班牙
藝人陶枳樽（Crz）日前飛到西班牙拍攝內地節目，自爆每日在酒莊「醉」住走之餘，更與拍檔張達明「夜蒲西班牙」見識，又感激對方照顧。
陶枳樽（Crz）早前遠赴西班牙拍攝內地廚藝比賽節目，擔任嘉賓及評審，她說：「主要都係食同玩，仲有飲酒，因為大部分時間都係喺酒莊嗰度拍攝。（之前去過西班牙未？）未去過，之前去過巴黎，喺巴黎如果你想食中菜嘅話，隨時都可以食到，但去到西班牙就係冇，只係得西班牙菜食，搞到我唔係好慣。」
讚前輩樂觀
談到今次拍攝，Crz坦言幸好有前輩張達明同行任嘉賓，趁拍攝空檔，兩人更齊齊出走夜蒲，她說：「我第一次見張達明，佢真係好照顧我，係一個好好嘅前輩。我哋等埋位嗰陣，佢教識我好多嘢，同埋佢個人好樂觀。（做完嘢有冇出去食嘢同玩？）第一晚返到酒店房休息時，原本想一個人出去行吓，但又唔係好夠膽，點知張達明話出去蒲，咁我梗係問佢去邊度蒲啦。佢話同助手出去行吓，我即刻問佢可唔可以跟埋去，我哋三個人就出去行吓、飲杯嘢咁囉。」
每次Crz出外公幹，最終都會生病收場，她說：「今次好健康咁返嚟香港，再加上每晚都喺酒莊拍攝，所以都有少少醉意，但唔係大醉，所以唔影響工作。」
文：專案組