何超蓮善用父幹屋企零資助

何超蓮今年成立慈善組織「Smile with us HK」，鼓勵年輕人幫助有需要的人，發揮微笑正能量，她曾協助單親媽媽搬屋及在街頭派禮物等，與巿民作近距離接觸。她表示自小受父母感染愛行善：「媽咪話幫到人係自己嘅福氣，爸爸會話賺一百蚊就要捐五十蚊。」她記得兒時經常光顧一位寧願賣白蘭花也不願申領綜援的伯伯：「當時諗，大個咗要用自己賺嘅錢去幫人，嗰種滿足感大過其他嘢。」

「自己做先識珍惜」

慈善組織成員被外界標籤為衣食無憂的富二代，超蓮強調：「我希望可以帶出唔係有錢先可以做善事，冇錢都可以行善，最重要有心去幫人。」儘管被認為成功靠「父」幹，但超蓮覺得出身不可改變，父親的成就毋庸置疑，因此決定正面地善用「優勢」幫人，她說：「啲人都話何超蓮等於賭王個女，我希望可以靠自己闖出一條路，知道我嘅人係因為我，而唔係因為何鴻燊個女。」又指過程中父母雖然沒有資助分毫，但感謝母親的支持：「媽咪話係我想去做呢樣嘢（慈善），就唔好諗住屋企會畀錢或幫我，每樣嘢都要自己做先識珍惜。阿媽最大嘅支持係每次做完活動返屋企，佢會煮晒啲餸喺度，問吓我做成點。我的確係因為父母而多人認識，但之後嘅全部都係我哋一手一腳完成。」正如她參與家中的一個澳洲酒店項目，三年半前由零開始慢慢摸索，終於領略到成功靠苦幹。

朋友當「同性」

熱心助人的超蓮礙於身份，難免被誤解而受盡冷言冷語，她無奈地說﹕「都會聽到人講『唔該你哋唔好做騷啦，你喺條街度派嘢，幫得啲咩？』呢啲我哋聽好多，亦會唔開心，但唔會放棄，時間可以證明我哋有心幫社會。」她多次強調現時只專注事業，問到如何拒絕追求者？她說：「大家做好朋友咁相處，但喺佢哋眼中，我係同性所以唔會相吸。（係咪唔鍾意畀人話你收兵？）會覺得對佢哋唔住，因為有啲有女朋友，依家啲朋友同我出街會離我九丈遠，因為行埋一齊就會變咗做兵，我真係冇乜兵。」

文：名人組

服裝：@catxman（牛仔褸）

場地：HMV