周柏豪逃出生天《勁歌》有獎攞
歌手周柏豪、陳曉東、鍾舒漫、泳兒等，前晚出席《2017勁歌金曲優秀選第二回》，柏豪未有因無綫與蕭定一的官司問題而遭封殺，陳曉東則透露正準備明年二月的個唱。
周柏豪加盟星夢娛樂後獲首個TVB音樂獎項，談到無綫因與蕭定一有官司而封殺旗下藝人，但他則幸免於難，他解釋指經理人公司是無綫與種星堂，而種星堂與蕭定一是合作關係，故未有牽涉其中。談到《勁歌》總選，他坦言未有寄望可以掃獎，因今年只有一首劇集歌曲。
陳曉東二月開唱
奪獎的陳曉東希望有更多機會唱歌，明年二月舉行演唱會的他，正密鑼緊鼓準備，至於會否加場？他說：「未知，佢哋話係巡迴演唱會，但未決定下一站去邊。」泳兒以低胸裝示人，氣管長期有問題的她，準備照氣管內窺鏡。而鍾舒漫近期拍片諷刺朋友用WhatsApp的奇怪行為，原來她拍片已有兩年：「起初只係玩吓，但愈玩愈專業，特登買相機、腳架、燈，仲自己剪片！（拍埋微電影？）未夠料，但將來唔排除，有可能做埋編劇。（出賣姊妹啲搞笑嘢？）其實佢哋幕前好似好斯文、保守，真人好搞笑同大癲大肺！」
何雁詩暗晒半球
至於身穿黑色魚網裝的何雁詩，上身透出黑Bra暗晒事業線，被讚性感時即怕醜地以外套遮胸，她笑指絕對不會除褸，又指性感留待台慶用，而男友鄭俊弘則覺得她特別有型，問兩人平日會否討論衣着？何雁詩指有：「但佢好少評價我，佢對Fashion冇乜意見，佢係鬼仔平時鍾意着Tee。（幫佢買衫？）會幫佢睇，買就佢自己去買。」
文：影視組