唐貝詩網上交友驚青剷App

唐貝詩為了操Fit體能，積極上堂學體操，在捷騰武術體操會教練Alex的訓練下，已能做出前空翻、後空翻、蜈蚣彈、拱橋、側手翻等高難度動作。

畀仔圍覺得爽

Lydia說：「我學咗幾堂，雖然好難，但好好玩，最初係見到學演戲嘅同學有學，所以想試吓，加上我本身紮紮跳，學咗體操對將來拍動作片都有幫助，成功做到某啲動作好有滿足感，想突破吓自己。（想做打女﹖）想呀，覺得好型，希望將來有機會做貓女或者神奇女俠呢類角色。（覺得自己有冇天分？）都OK，至少教練叫我做我就做，唔會驚！」

早前Lydia為奇妙電視拍攝的劇集《熱戀100天》已播出，反應不俗，獲不少朋友捧場，她笑言：「呢套係青春愛情劇，我好鍾意拍愛情戲，好開心。我個角色係做大學生，好受歡迎，好多男仔追，同我大學時好唔同，所以拍嘅時候好爽！」

唐貝詩恨做打女，日日勤加操練。	唐貝詩來個站立一字馬，係威係勢！	在教練指導下，唐貝詩苦練空翻。

拍拖都唔會公開

戲中講述她與麥子樂通過交友App而認識，問到現實世界有否試過玩交友App？她坦言為這部劇下載了一個交友App：「諗住體驗吓，初時睇極都唔合眼緣，之後終於揀啱咗一個，跟住個畫面彈咗一句：『依家通知對方』，我睇到好驚，即時刪除咗個App，因為我係用自己張相。我唔會亂識朋友，唔會去一個地方識啲三唔識七嘅人，因為覺得好危險，我一定要由朋友介紹。」問到Lydia有否拍拖，她說沒有，但補充說：「就算我拍拖都唔會講，覺得冇需要公開。（揀男友要圈中人？）唔一定，但要理解我嘅工作，平常人係好難理解，所以最好係同娛樂圈有關嘅人。」

文：名人組

場地﹕Calisthenics Base