Shine突破樽頸鬥出秘密武器

Shine成員徐天佑及黃又南攜手度過逾15個寒暑，雖偶有拗撬，但這段友情絕非筆墨能形容。他們決定明年三月在紅館「合體」舉行「Shine Moments Live 2018」，二人豪言今次騷肌及勁歌熱舞之餘，更分別表演一項連對方也不知曉的拿手項目，務求讓觀眾留下難忘回憶。

「你哋係組合嚟o架？」

談到當初「分手」又「復合」，Shine感謝黃偉文5年前的作品展將他們再次緊扣在一起，當時樂迷的熱烈反應令二人不懂招架。天佑以樽頸位形容當年「分手」：「覺得做落去都冇新意、冇意思，亦冇諗過分開會唔會影響生計，總之唔想再做。嗰幾年我哋分開發展，但經常喺片場碰面，最諷刺係有次我哋喺內地拍同一部戲，拍咗好耐有演員忽然話：『原來你哋係組合嚟o架？』」

天佑與又南形容「復合」後默契十足，即使意見不合亦會冷靜處理，然而當年二人竟因小事險些大打出手！天佑回憶說：「嗰時喺日本受訓，一齊去超市掃貨，為咗點樣拎盒士多啤梨返宿舍，竟然嘈到想出手，好多日本人望實，要助手分開我哋先得！我諗當時係好多生活小事積落嚟嘅，但如果冇嗰段日子，相信我哋冇咁了解對方。」

兄弟出道窮到燶！

天佑14歲於街頭被導演陳果發掘，去了當時位於太子的經理人公司與經理人錢小蕙（Amy）見面，又南出道過程亦相似。兩年前經理人公司被「迫遷」往觀塘，兩兄弟落手落腳「搬家」，二人更帶記者重遊舊地，路過花店及報販攤檔時與店主閒話家常，又南笑說：「呢個地方留低咗好多回憶。以前開演唱會粉絲排隊買飛，由街頭排到街尾，啱啱出道時冇錢又鍾意睇車書，就同樓下報紙檔老闆娘講入公司數……一係等我哋搵多啲錢，出高價幫Amy買番個單位返嚟再搬番去。」

文：影視組

攝：司徒國榮

髮型：Alex Blue@Number 8 Hair Salon

化妝：Henry Tse@BigCstyling

服飾：Ted Baker