李佳芯色誘夠《誇》「豪」言再奪視后
陳豪與李佳芯（Ali）在劇集《誇世代》中由假結婚到擦出愛火，其中Ali出盡招數引發連場色誘，演出令人驚喜！她直言不敢藉此問鼎視后，陳豪即畀信心：「由新加坡殺去香港！」
無綫50周年台慶劇《誇世代》，集合歐陽震華、陳豪、田蕊妮、李佳芯（Ali）與邵美琪等「五生五旦」，炮製出集穿越奇幻與恩怨情仇於一身的精彩劇情，令觀眾睇得捧腹大笑之餘又緊張刺激。故事由今日開始逐漸入直路，「誇」指數更以幾何級數躍升，其中「Mike」陳豪與「Paris」Ali一對冤家便開始由各懷鬼胎、同床異夢的假夫妻，變成有着共同目標的真愛侶。戲中，為報復尚家而迎娶Ali的陳豪，一邊為女方見招拆招而漸生情愫，一邊卻被歐陽震華等兄弟提醒他毋忘初衷，左右做人難！
膠紙甩甩哋險走光
受訪時，陳豪直言與Ali是「嘭嘭聲」充滿着愛：「係鍾意佢又唔敢鍾意佢！」Ali則指角色為陳豪，從刁蠻任性變得懂為人設想：「仲要不停勾引佢、吸引佢注意，諗點樣令佢鍾意自己！」除了經常在陳豪面前打扮得特別Sexy外，Ali還自爆有一場戲會露全相：「第一次成個背脊露出嚟！當時我淨係可以黐膠紙，個個都話好穩陣，但係拍嗰陣啲膠紙真係開始甩！好危險！撳邊都唔掂，但個樣要扮得好安全！」陳豪聞言即笑指拍攝時內心很興奮。
提及Ali在新加坡獲封視后，陳豪力捧她可以憑「Paris」在香港再下一城！Ali卻謙虛指自拎「飛躍」已感開心，搞到陳豪恨鐵不成鋼：「你係視后嚟！畀啲信心啦！要殺埋香港！」
文：影視組