惠英紅片酬一折攞獎賺番

首奪金馬影后的惠英紅，自言搵唔到錢，皆因很多演出都是「搭膊頭」幫朋友。

57歲的惠英紅今年內一口氣拿了六次大獎，憑《幸運是我》先後摘下「亞洲電影大獎」、「金像獎」及「澳門國際電影節」等多個電影節的影后寶座。多年來她與「金馬影后」擦身而過，前晚她終憑主演電影《血觀音》吐氣揚眉，成為本屆金馬影后！前晚得獎後，她返回後台親吻獎項任影唔嬲，更明言宣布賽果一刻緊張到手震，且眼前出現很多星星，深怕自己會暈倒，認真搞笑。

事後她轉場出席慶功宴，獲金馬執委會主席張艾嘉到場恭賀。當被追問會否趁得獎而加片酬時，她坦言「加到就加」﹕「我一路以嚟都搵唔到錢，因為好多戲都係搭膊頭接，大家朋友嘛。」據悉，惠英紅對《血觀音》的劇本情有獨鍾，原本片酬約500萬港元的她執意接拍，主動將片酬降至一折，僅收數十萬港元，難怪她得獎後自言「使了小手段」，而經理人公司亦相當支持其決定。

電影《血觀音》贏得多個獎項，吐氣揚眉！	勇奪「最佳女配角」的文淇，全晚不停打呵欠。	同為好戲之人，惠英紅與張艾嘉惺惺相惜。

衝奧斯卡？「我英文窄窄哋」

對於首奪金馬影后，惠英紅坦言得獎後第一時間致電公司老闆楊受成「報喜」，她說：「楊生真係好支持，梳頭、化妝同服裝都係楊生出錢。其實四個入圍者都好好，賽前我睇好張艾嘉嘅。（評審話四輪投票先選出影后。）係呀？我之前做評審都畀高分尹馨，文淇得14歲，但佢處理感情戲好叻，當然我自己都幾好，今次演反派，我放咗好多工夫去揣摩角色。」當被問到下一個目標是否奧斯卡時，惠英紅謙稱：「奧斯卡？哈哈！但我啲英文窄窄哋。」

惠英紅今午將凱旋而歸，晚上出席經理人公司為她舉辦的慶功宴，然後休息一天再投入新片開鏡，她說：「今次會演姜皓文太太，要唱大戲，花旦同小生都要做，所以要學。」而出爐「最佳女配角」文淇出席慶功宴時坦言好眼瞓，故不停打瞌睡，而下個工作將夥拍內地組合TFBOYS成員王俊凱演出內地電視劇。