吳若希爆菊梓喬偷橋拍MV：我嬲呀!

產後復出的歌手吳若希（Jinny）昨日相隔一年多現身電台，宣傳劇集《那年花開月正圓》的主題曲《你在我心間》，表示新歌是生完BB後第一首錄的歌。問到全面復出的她是否要重奪一姐地位？她笑言要收復失地：「因為我每次返到屋企，個女都係黐爸爸或者工人多啲，所以我要收復失地！」講到師妹菊梓喬（Hana）是星夢第一個衝出香港拍MV的人，Jinny即扮嬲笑言：「係囉，條橋我提議(口架)，我嬲呀！我係第一個向老闆（何哲圖）提議去台灣拍MV，老闆話好呀，但結果畀咗第二個人去拍。其實咁啱我啲歌又未錄起，所以就冇啦，而胡鴻鈞就係第二個去台灣拍MV。」

拉隊過澳門拍攝

問到可會向老闆提議做下一個去台灣拍MV的歌手？Jinny透露其實去過當地拍MV：「未生BB前同許廷鏗去咗，不過因為首歌未plug，所以就冇啦。」據知該曲未見街與許廷鏗已跳槽華納有關。Jinny坦言其實公司很錫她，10月時整個香港團隊到澳門為她拍新歌MV。講到有指Hana威脅其一姐地位，她笑言：「我依家威脅佢，我係人妻，又係人母，多幾個Title。」提到之前與老公Alex到歐洲影婚紗相，她笑指不難忘亦不Sweet，問到老公可有順便求婚？她笑言：「冇喎，嬲！」

菊梓喬（左）認為吳若希只係講笑扮嬲。

菊梓喬開開心心去台灣拍MV，點知激嬲吳若希。

Hana：平時有偈傾

至於「偷」Jinny橋去台灣拍MV的Hana透過電話回覆：「有啲咁嘅事？佢（Jinny）成日都講笑，我知佢唔會嬲，因為我哋平時都有食飯傾偈，佢都話鍾意我啲歌。」而何哲圖透過電話坦承Jinny有向他提及到台灣拍MV一事：「因為佢之前要結婚，其實我哋會分批去外地拍，佢依家呢首新歌都喺澳門拍，我哋計劃遲啲安排佢去台灣拍兩首新歌MV。（幾時拍？）未知，搵到兩首好啲嘅歌就去。」講到Jinny話自己嬲，他表示：「誤會。（Jinny度橋，但你畀咗Hana拍，事前有冇話畀Jinny聽？）冇，我同阿妹（Jinny）好熟，佢唔會嬲。」

文：音樂組