陳曉東搞肌舉女操Body

陳曉東、名模Ana R.、Super Girls成員Aka（趙慧珊）、歌手J. Aire及藝人梁嘉琪昨日出席「維新烏絲防脫洗髮露」發表會，東東透露今次留港一星期，他預計明年會舉行個唱，希望這次返港可落實細節。

已訂場落實就公布

東東說：「有一個場地留咗日子畀我，落實咗再公布。（紅館係咪冇期？）唔講太多喇！」不過，為了演唱會他已積極操練，笑言：「依家日日『搞肌』，我請咗個教練，已經進入專業運動員嘅時間表，一星期練三、四次健身，每次兩個鐘，要練好體態。我依家可以一邊手舉起一個女，佢哋都十幾二十斤重。（你掛住操，太太有冇投訴？）佢陪我一齊操，生完兩個小朋友後，佢身體都回復得好好，而且佢搞服裝生意，都想自己做個樣辦，我哋一齊做Gym。（兩夫婦一齊合唱？）到時先算啦。（一家四口上台？）我唔知，到時先。（小朋友有冇音樂天分？）有音樂天分。」

放大圖片	陳曉東勤力操肌，妻女都支持他。	Aka一身青春打扮，嬌俏可人。

自組公司未來多搞作

東東又自爆正籌備開製作及經理人公司，打理自己的娛樂事業，稍後會有一首全新廣東歌派台：「首歌係之前嘅國語歌改成，因為好多香港粉絲對呢首國語歌反應好好，所以就變成廣東版。（會唔會出席香港音樂頒獎禮？）睇公司安排。（咁耐冇出席會唔會唔慣？）唔會，嚟緊都好多香港活動出席，我會做湯寶如演唱會嘉賓，黎小田有個作品展都聯絡咗我參加。」

至於Ana則表示產後出現脫髮問題：「我諗係因為所有營養同好嘅嘢都畀晒個女，之後食咗好多維他命補充劑，依家變番正常。」

文：名人組