靠第一眼搵對象 黃心美畀心穎點醒唔宅先有拖拍

黃心美現時主力主持工作，問她可有興趣拍戲？性格率直的心美笑言：「有人搵我先得(口架)！自己唔介意，已經拍過幾套劇。」她直言演出沒有底線：「我有次同盧覓雪傾偈，佢話拍戲係飾演一個角色，唔需要在乎自己形象，難得人哋畀機會，只要勝任我都OK。」

工作狂怕再賴嘢

心美自言是工作狂，慶幸離婚後有工作寄託：「我重心一直喺工作度，如果我可以放棄工作去台灣，或者前夫放棄工作嚟香港，咁就唔會Long D。」遠距離相處方式最終令兩人離婚收場，她坦言：「依家滿身傷痕纍纍，有下一個嘅時候，希望多啲時間相處，廢事又賴嘢！」心美又說：「作為一個坦白嘅人，我都冇辦法交代真正離婚原因，有啲嘢兩個知就得，始終兩個人愛過，分開唔需要潑婦罵街，但係自己絕對要負責任，一隻手拍唔響，要分開，兩個人都有責任。」

心美自言第一眼就知會不會愛上對方。	心美笑指被黃心穎（左）點醒，才不再宅在家。	心美表示要給予男友安全感，故公開戀情。

「三十幾歲仲玩Feel」

心美早前跟同公司的藝人陳安立傳出緋聞，但對方非其真命天子，她最近在網上公布戀情，笑言是黃心穎令她開竅：「畀阿妹點醒咗，唔好成日宅喺屋企。我需要長時間觀察，同埋我好衰，一眼就知自己鍾唔鍾意嗰個人，一定要有嗰一吓先可以發展，三十幾歲人仲玩Feel，哈哈！」而心美前晚出席活動，依然不願透露男友身份：「唔想公開佢身份，公開戀情係因為唔想拍拖收收埋埋，安全感唔單止係女仔要。（拍咗幾耐拖？）好短時間，但過咗三個月，佢係圈外人，唔想影響佢生活。」她指心穎已見過其男友，也戥她開心。

文：專案組

攝：張福宏

場地：軒琴居（香港仔店）