張晉寫卡冧妻禁情話曝光
女星蔡少芬（Ada）與老公張晉出席活動時大放閃光彈！掌管張家財政的Ada表示平時小鳥依人，凡事以老公為先。張晉聞言即指對方是管家婆。早前離家拍戲近一年的張晉為答謝太太，親筆寫卡表心迹，但「禁止」Ada公開內容。
Ada與張晉昨午拍拖出席「澳至尊」新店剪綵活動，Ada全程小鳥依人，不時望着老公甜笑又作勢「獻吻」，更親手為張晉束上「辮子頭」，結婚9年的二人恩愛如昔！二人受訪時繼續放閃，Ada自稱「旺旺」：「我腳頭好，代言品牌陸續上市。（將老公上埋市啦。）佢上咗喇，去埋荷里活喎。」
囡囡愛搞破壞
Ada不諱言掌管張家財政大權：「佢（老公）交晒啲嘢畀我，但我都好大壓力o架，要識理財，等老公放心交晒畀我。平時我好小鳥依人嘅，凡事老公行先，佢有話事權。」張晉聞言即說：「即係管家婆，我真係打唔過佢。」Ada表示老公有私己錢，自己則很慳家，全因不是含金鎖匙出世，懂得積穀防飢：「我連買錶送畀老公做禮物，都會計吓有冇升值潛力，不過邊有（記者）寫到咁誇有成億物業吖？有啲啫。（紅簿仔有好多個零？）有零囉。」
談到二人成功為愛情保鮮，Ada大爆張晉鐵漢柔情的一面：「佢之前連拍兩部戲，差唔多成年唔喺香港，點知佢返嚟寫咗張卡畀我，我睇到好感動。」此時張晉「禁止」太太公開內容，但笑說：「佢同我都係演員，但佢仲要照顧家庭，多咗份冇錢嘅工，佢辛苦啲。寫張卡畀佢，係因為知佢鍾意儲、會珍惜。」Ada又笑指二人拍拖散步，兩位囡囡喜歡「搞破壞」﹕「佢哋見我哋拖手，就喺中間衝過嚟，又會坐喺我哋兩個中間，貪玩囉。」此外，46歲的朱茵、47歲的洪欣及51歲的陳法蓉都是10月壽星，獲44歲的Ada為她們慶生，四大美人年齡加起來剛好是188歲，不少網友都大讚她們保養得宜。張晉及洪欣的丈夫張丹峰均有到賀。
文：影視組