數爆黃翠如「七宗罪」 洪永城闖影壇淆底冇膽剝光豬

「結婚」滿足集體回憶

相識超過十年的藝人洪永城（Tony）與黃翠如，Friend過打Band似好姊妹更似好兄弟。有一班網民覺得他們是天生一對的金童玉女，更有人寫下《每個男人心裏都有一個黃翠如》這篇流傳一時的網絡潮文，「歌頌」這段不能開花結果的感情。這對最佳拍檔在旅遊節目中出雙入對，至今年初無綫播出的劇集《我瞞結婚了》中，終於飾演一對情侶令網民「圓夢」，Tony笑說：「滿足到大家嘅童年回憶，個個都由細睇到我哋兩個嘅旅遊節目大！如果可以帶到啲好嘅回憶，同好嘅感覺畀大家，始終呢種係一種存在喺心入面嘅美好感覺，有時釋放出嚟都幾好。」問會否想再合作？他卻笑說：「黃翠如咁有錢，佢好有可能唔做，真係可能冇機會！」

拒做樓奴恨移民

雖然Tony好慶幸與翠如攜手炮製過大家喜歡的節目，更謂希望繼續拍落去，但最近他就「賣甩」翠如，一個人走去拍旅遊節目《退休地圖》，更被對方投訴「被飛起」！Tony笑說：「唔係啩，佢每日都幾組戲喎，咁都要夾啱時間、地方先可以做到嘅。」在節目中走訪哈薩克、馬爾他、哥斯達黎加等國家，他亦指想過另類生活，不想完全困在香港被樓債「奴役」：「其實可以喺世界各地有唔同嘅生活方式，唔係一定要喺香港做一個樓奴，我哋其實係有選擇。」

洪永城同翠如劇中做夫妻，能滿足大家的童年回憶。	洪永城話想「着草」移民去哥斯達黎加。	洪永城唔抵得翠如靚，仲話唔鍾意蕭正楠唱歌好聽。

問到會否想移民一走了之？他坦言曾想到台灣落地生根：「但我去完哥斯達黎加之後，都好想移民去嗰邊，嗰邊真係好Chill，冇咩競爭，好平和。（唔買樓？）都需要嘅，但覺得樓價過高，好難可以上車。（有儲首期？）咁一定有嘅，但好似過一陣樓價又升，又要畀多十幾廿萬，我諗冇一個地方咁荒謬。睇報告都話全世界最高樓價係香港，冇晒生活。」他更指透過今次節目知道二百萬港幣就可在馬爾他買一幢三層高的臨海小古堡：「我哋喺香港辛苦供廿年，可能都係得四百呎，係咪好似有啲唔甘心。」

洪永城接受唔到裸體上陣，錯失演出機會。	拍劇成功入屋的洪永城，想埋堆玩埋大銀幕。	洪永城過去拍旅遊節目曾犧牲色相。

唔抵得人哋有錢

Tony與翠如私交甚篤，除非常清楚互相的優點，更十分了解對方的缺點。講起翠如的缺點，Tony即列舉她的「七宗罪」：「佢最大罪係靚，最衰就係太靚，同埋太Pure，我估唔到佢咁多年之後都仲Keep到，佢同十幾年前比都係冇變過！例如智商！」不過他之後都補飛大讚對方的純真能令身邊人處於舒適的狀態：「佢令身邊嘅人都好開心，只不過係佢有時太忙，思緒、諗嘢可以再好啲。（有話過佢？）有提醒過，但呢個可能係佢嘅個性，佢係好堅持，但佢知道自己做咩就得(口架)喇。」之後Tony更笑住數翠如其他罪行：「我唔抵得佢男朋友（蕭正楠）唱歌好好聽！我唱歌就唔得喇，有試過嘅，但唔係好好。我希望可以喺音樂同跳舞上面發展。」問會否憎她「有錢」？他笑說：「唔止憎咁簡單，嗰個層次好複雜！」他更笑住數她衰腳長，但筋骨硬及大鼻，認真搞笑！

放大圖片	洪永城撇甩翠如單拖拍旅遊節目。

冇身材做「鴨王」

提到Tony在旅遊節目和劇集上，就算未稱得上略有所成，都可以叫做非常入屋。問他會否想趁機闖影壇？他說：「其實我都好想試新 嘢，但係電影圈對我嚟講好陌生，唔知點樣可以入呢個圈子。（邵氏都有開戲。）都唔排除呢個機會，如果有機會拍到電影，學到嘅嘢都可以帶出嚟，其實全部都係演藝上相輔相成，好希望有咁嘅機會。」問他是否試過錯失開戲機會？Tony說：「唔可以話係錯失嘅，係咁唔夾唔到嗰個機會，其實有好多套搵過我，但係突然間度唔到期。（最爆邊套？）真係要講？曾經《一路向西》個導演都搵過我，叫我演一個幾重要嘅角色，當時都講得好清楚o架喇，唔會係水我，係要除衫，係要裸，露晒，但係我話我相信我做唔到。」更笑指自己一來沒身形，二來接受不來：「雖然都唔使身形！（做『鴨王』得唔得？）要好弗o架！」

文：影視組

攝：秦健輝

服裝：Lane Crawford

場地：Waalah