周慧敏遭無賴騷擾「女俠」挺身解圍
周慧敏（Vivian）一向溫文儒雅，但為宣傳演唱會加場，竟然孖「整蠱專家」李健宏（KB）夾計在茶餐廳玩食客，上演「霸王硬上弓」老屈女神影相兼搶手袋。面對KB一副無賴格，有女食客「女俠」上身為Vivian挺身而出。
Vivian為慶祝入行逾30年，將於明年1月26、27及28日假紅館舉行《一萬天荒愛未老周慧敏30週年演唱會》，三場門票早已售罄，她昨日宣布加開1月29日最後一場。為宣傳個唱，她和專拍惡搞節目的歌手KB到茶餐廳惡搞食客，並將過程上載Vivian的官網。
片中所見，單拖的Vivian靜靜坐在餐廳的四人位低頭食麵，對面有一少女食客，搭枱的KB坐下後，「發現」Vivian即驚喜大叫：「周慧敏！」之後展開一連串「騷擾行為」。他除了大聲在電話中跟友人「炫耀」與女神食茶餐，又強行逼她影合照，雖然Vivian以食麵為由婉拒，但KB堅持要同枱少女代揸手機影相。之後他又拿Vivian的飲品和麵放口入，嚇到少女立即離座。
另一次的對象是一對男女，KB重施故技滋擾Vivian。當Vivian表示食完麵才合照，該女食客忍不住出聲：「問咗佢（Vivian）可唔可以先！」及不停勸KB要低調。當KB又用手拿Vivian的麵放入口時，女食客即叫男伴跟Vivian調位，怎料KB質問男女食客：「你哋兩個咁撐佢，佢係咪請你哋睇演唱會先？」之後KB欲搶正離開的Vivian手袋，女食客即出手阻擋，最後KB自爆是整蠱節目，食客們才鬆口氣然後爆笑。
「大家睇住大家成長」
事後Vivian在社交網留言：「無諗到KB咁樣來賀我演唱會加場。」並指：「1996年去澳洲表演就認識當時仲係學生幫我打鼓嘅KB，真係大家睇住大家成長啦。」
文：音樂組