開騷三度落淚 憶蓮當住恭碩良掛念另一男人！
現年51歲的林憶蓮（Sandy）前晚在個唱大騷唱功及舞功，寶刀未老的她孖兩女舞蹈員大玩「人肉三文治」。全晚喊足三次的Sandy向鼓手男友恭碩良隔空傳情，公開讚對方充滿才華兼一直守在背後，但原來她生命中最重要的男人並非僅得恭碩良一人！另一舉足輕重的男人就是音樂總監倫永亮！
Sandy一連四場紅館演唱會前晚開鑼，三面台爆滿，她在台上施展渾身解數大唱大跳，當唱到串燒經典快歌《灰色》、《瘋了》、《燒》、《拒絕再玩》及《無心睡眠》時，Sandy愈跳愈High，全場歌迷起身勁扭，掀起全晚高潮，Sandy更三度感觸落淚。
讚男友有才華
敢愛的Sandy於2013年公開承認與細自己11年的音樂人恭碩良（Jun）發展姊弟戀，至今拍拖4年多，感情穩定，Jun不時給予女友音樂意見，更多次擔任Sandy的個唱鼓手。Sandy在個唱趁機公開大讚男友：「大家都熟悉佢，佢係充滿才華，恭碩良，之前上《歌手》（內地歌唱節目）每次收到編曲只得一、兩晚去練，每次入錄音室唱，佢都會陪住我、教我點唱同和音，多謝你。」Jun即起身合十感謝大家，並承認是個不完美的人：「我並不是一個完美嘅人，但唔介意畀大家睇到我嘅缺點。」
Sandy笑言人生中有兩位重要男人，除男友Jun外，另一位是個唱音樂總監好友倫永亮，她說：「佢喺節目中係音樂總監，每個禮拜接受挑戰，得一星期編曲，當有好多改動，佢要同好多編曲人通宵開會，我好幸福有咁好嘅音樂夥伴。」隨即淚流滿面，更提到年初參加《歌手》時被抨擊一事：「經歷咗好多，係個寶貴經驗，接呢個節目時，有好多朋友有唔同聲音同意見，有啲朋友覺得我唔需要做，但我獲益良多。」
不斷改進成長
Sandy坦言身為歌手應該要不斷挑戰自己：「從來唔覺得大家畀我天后同歌后封號，我係歌手要不停成長，喺節目認識好多新朋友，學到好多嘢同有進步，好多人企喺好舒服位置就唔願意挑戰自己。」
文：音樂組
攝：鄭家俊