加操西洋拳 封咪血戰 陳庭欣一對十老外 捱打瘀晒
擁有索爆身材的「咪神」陳庭欣拍劇絕不錫身，最近為新劇遠赴英國拍外景，飾演打得保鏢的她，日前更「葉問上身」以一敵十，激戰十名外籍魁梧大漢。平日有練泰拳的她打得有板有眼，但最終寡不敵眾遭毒打，現實中的她亦一樣美腿瘀晒，認真慘慘豬！
2010年港姐冠軍陳庭欣（Toby）入行後多做主持工作，並憑33.5C蜜桃胸獲封「咪神」。近年她開始多拍劇發揮演技，最近更與王浩信、朱晨麗及伍允龍等拍攝林志華監製的新劇《兄弟》，搏到盡上演連場動作戲！
日前Toby拍攝一場激戰十名大漢的打戲，相比起一眾老外的魁梧身形，即使穿上厚身外套，Toby仍顯得相當嬌滴滴。不過她輸人唔輸陣，以伸縮警棍迎戰，連打三個鐘依然應付自如，但最終仍慘遭老外毒打。鏡頭前Toby被打至粉臉流晒血，雖然只是特技化裝，但現實中亦一樣美腿瘀晒，更因穿上有踭鞋在碎石路上拍攝，多次險拗柴。
着兩條褲護身
已學泰拳三年的Toby出發前加操西洋拳，故拍攝時絕不姐手姐腳。不過首次演打女的她直言「實戰」難度甚高，出發前武林高手伍允龍亦有提點她幾句，Toby說：「起初最擔心係驚真係打到人，所以試位都唔敢嚟真，但佢哋叫我要真打，好多動作係即場學，每次都要打十幾次，拍完半日，成個散晒，超級攰，鞋都爛埋，但另一日仲要拍追逐戲，係體能考驗！」一個女仔跟十名猛男對打，問到有否做足安全措施以防被碰到重要部位？Toby笑說：「我有着多兩條褲囉！因為天氣凍咋！咁多位老外都係專業龍虎武師，大家好識就位，不過有位老外因為閃避而扭傷腳，雖然唔係直接關我事，但都有啲唔好意思。」
向伍允龍偷師
Toby透露稍後會再遠赴菲律賓拍攝大型動作場面，問到是否打上癮，轉行打女之路？她說：「冇諗咁遠喇！拍好呢套先，暫時冇咩大傷已經係萬幸，自己唔係好識用力，成日用死力，又有好多角度要學點就位，好多嘢有排學。」她直言稍後要跟伍允龍及功夫新星羅浩銘練習，望在鏡頭前打得更瀟灑。
文：影視組