亂噏阿媽「電話號碼」林作玩謝無辜 機主家屬嗌報警

在網上極度活躍的林作，早前爆媽咪要賣豪宅套現周轉，更揚言願做鴨代母還錢。賣樓消息傳開後，他表示收到逾百地產經紀來電，昨午他又發文呻被經紀騷擾至忍無可忍，寫道：「據說媽媽仍然喺北京風流快活。致所有地產經紀，由於你哋阻緊我接Job，因此依家凡係接到經紀電話，我會接，然後同你講，由於你冇留意『市場消息』，話我唔再覆電話訊息，我會馬上Block咗你。況且層樓又唔係我嘅，冤有頭，債有主，應該搵我媽媽先係(口架)！」他更公開媽咪的「電話號碼」，並說：「受夠了，搞到連工作邀約嘅電話都冇接到，每個經紀講同一番話，冇個係人性化少少嘅，討人厭。」

女聲聽電話即Cut線

問到有否與媽咪傾過？林作說：「未，佢都冇講幾時返。（嬲佢？）冇，佢咁多年都係咁飄忽。」他聲稱所公開的號碼只是「假電話」，並揚言：「冇人會中，冇事嘅！」不過，該號碼其中6個字連排列次序都與林母的電話號碼相同，加上記者照撥該號碼時，話筒傳來一把女聲稱「撳咗佢咪聽」，隨即Cut線，證明林作「老作」的號碼並非空號！對於該號碼的機主可能無辜受騷擾，林作說：「剛開始可能輸入錯誤8個字號碼，我很快改番9個字號碼。（公開人哋電話，怕唔怕惹上法律責任？）法律上冇咩問題。」然後扯開話題鬧爆騷擾他的地產經紀。

對於林作出Post玩謝無辜市民，不少網民留言鬧爆，一名自稱受害者家屬更揚言會報警：「呢個電話號碼嘅持有人係一個退休嘅老人家，請你搞清楚先好Post，如果你呢個Post令該老人家受到不必要嘅騷擾，我會報警及採取相關行動，謝謝。」

文：名人組