蔡思貝屈視帝「萬歲」慶功
無綫劇集《踩過界》大受歡迎，橫掃《星和無綫電視大獎2017》，當中蔡思貝、張振朗及朱千雪昨日已返港出席活動。思貝滿意賽果，最感動是好兄弟張振朗奪男配角獎，她說：「佢台上喊到變豬頭，我喺台下都狂喊，我覺得我哋有啲經歷好似，所以經常傾心事，佢得獎我係特別感觸！」問到會否屈出爐視帝王浩信請食飯？她笑說：「會屈佢o架喇！但佢依家去咗英國拍劇，等佢返嚟大家一定要食番餐。」她又讚視后李佳芯為角色挑戰個人底線，演得出色，不覺得賽果爆冷。
至於張振朗與朱千雪出席另一活動時，表示已平復心情：「頒獎嗰刻思貝、千雪同浩信一齊捉實我，我好感動，眼淚就咁流落嚟。（女朋友陳芷尤恭喜咗你？）好多好朋友都有叫我畀心機，咁我哋（與女友）有溝通，但我返嚟都係工作先。」問到女友有否吻賀？他笑說：「滴汗喇！」並轉向千雪「求救」，想不到千雪卻「伸他一腳」：「你結婚喇？」至於千雪在頒獎禮鮮有地性感登場，問到男友可有詐型？她說：「唔知佢有冇睇報紙。（男友有乜接受唔到？）冇傾咁深入。」
