劉美君尾場個唱取消扁嘴爆粗

昨午5時仍懸掛8號波，劉美君（Prudence）的演唱會第二場無奈宣布取消。雖然知道舉行無望，但她接近5時仍然乘保母車出發往紅館，並在車上做直播：「我想話畀大家知我冇放棄！」可惜行車途中被告知個唱要取消，她即一臉失望扁嘴，更忍不住爆粗：「Shxx！」又苦笑着鬧：「死人天文台。」當得知一班粉絲不開心，她直認感同身受：「我都唔開心，係失望，但冇辦法。」Prudence坦言個唱取消後應該不會有補場，因紅館沒有檔期：「我唔知要等幾耐，將來有期咪再做番，我又未死，唔死就仲有得做，」並表示已購票的歌迷可以辦退票手續。而另一段片中見她直踩紅館舞台影空櫈及舞蹈員。

吊高旋轉又跳辣舞

而前晚頭唱演出，吸引不少圈中人如陳慧嫻與蔡一智夫婦等捧場。Prudence今次不只騷唱功還騷演技，全晚以十多個不同角色現身，舞台亦換上十個不同場景。她身穿高衩裙打頭陣，吊在幾米高的十字架上獻唱，另一幕則穿上裙褂唱《甜甜小公主》，並獲契爺胡楓聲演《一雙舊皮鞋》的父親角色。好友林保怡任嘉賓，合唱兩人經典作《偷窺》，相擁時惹來歌迷尖叫。

劉美君	劉美君以Deep V戰衣開騷，輕輕烏身目不暇給！	劉美君自拍時得知個唱取消，即刻爆粗！

Prudence在舞台極速變身Bra top，置身在巨型盒子中並作360度旋轉，邊「倒奶」邊唱出《我真的受傷了》，獲觀眾拍掌叫好，其後又反串男裝與女舞蹈員大跳辣身舞。個唱尾聲時，Prudence以性感吊帶Deep V出場，笑言全晚都不大聽到歌迷的聲音：「因為我戴耳機唔知你哋噓、柴台定點，其實我唔鍾意講嘢，所以先做呢個騷。」

劉美君與林保怡合唱經典歌，全場歌迷High爆。	劉美君360度旋轉，邊「倒奶」邊獻唱。	反串的劉美君與女舞蹈員跳辣身舞，夠晒大膽。

隻腳瘀晒似「熊貓」

完騷後，Prudence受訪時講到綵排整傷腳，坦言若不化妝會嚇死人：「隻腳黑色一撻撻好似熊貓咁，成隻腳都瘀晒，出場要補妝再着絲襪。（點整傷？）撞到啲櫈，又跪喺度，所以膝頭黑咗成兩個月。（尋日綵排又整親腰？）換衫時張櫈移咗位唔知，所以成個撻咗喺度！當時唔知痛，係返到屋企見到屁股黑咗。其實十字架嗰度好辛苦，因為個頭盔勒住我個喉嚨唱歌。」她又指雖然周身痠痛，但一演出便不覺痛。

文：音樂組