李天翔急娶老婆：成個程序都錯晒！
無綫綠葉王李天翔日前向拍拖六年的女友譚寶怡（BoBo）求婚成功，昨日他與BoBo到律師樓簽字正式做「老襯」，一對新人在儀式上鼻尖對鼻尖又咀嘴晒恩愛，BoBo更感動到喊。
天翔在簽字後與好友鄭世豪現身中環受訪，大晒閃爆婚戒，他說：「好簡單咁喺雙方家長面前簽字，過大禮都係幾日前嘅事，聽講呢幾日都係好日，今朝成個程序都錯晒，我哋去咗女家斟完茶就上咗律師樓，正常好似係去男家、女家再上律師樓。」
天翔急急結婚，問到是否雙喜臨門？他笑說：「唔係！但都算急嘅，籌備咗兩、三個月。（有造人計劃？）暫時未，因為我哋都係冇乜耐性嘅人。（放假度蜜月？）嚟緊會去沖繩，會影埋婚紗相同會去教堂行禮，暫時只安排屋企人，圈中朋友就通知咗鄭世豪、黃嘉樂，佢哋有時間會買機票嚟，香港就唔會補擺。」