細細粒心靈飢渴Mag阻搵食
歌手林欣彤（Mag）與藝人陳嘉佳（細細粒）為無綫拍劇而成為閨蜜，現時同屬王祖藍旗下的經理人公司，在公在私的距離愈拉愈近。Mag取笑眼闊肚窄的細細粒心靈飢渴，反被對方指吃飯時阻住叫餸。
吃貨拒做大嘥鬼
M：林欣彤 細：陳嘉佳
Mag與細細粒雖然外形大有不同，一個圓潤、一個纖瘦，但原來兩女極愛美食！但在美食當前，她們卻有不同「食」法。
M：我成日食到頂住個胃，但仲想繼續隊！
細：嗰時同你拍劇食飯，有同事食晒啲雞冇食飯，你話唔好嘥，然後攞咗啲飯食。
M：我好怕嘥嘢食。
細：同你食飯有樣嘢好唔舒服，就係你成日唔畀我叫餸！
M：你成日眼闊肚窄，唔可以嘥嘢食(口架)！
細：我好想食呢個、嗰個，我哋四個人叫七、八個餸都唔過分，平時同助手食都叫六個餸啦！
M：食唔晒吖嘛！呢個世界好多人捱餓。
細：但我食唔飽喎！
M：你呢樣想食啲、嗰樣想食啲，係心靈飢渴，唔係因為肚餓。
細：所以同你拍劇嗰幾個月瘦咗幾多，下午茶都唔畀我食。
M：如果去旅行，嗌得太多我會截停你。
細：難得去旅行，見到餐牌十樣有八樣想食，唔食就唔知要等幾多年先食到，等多幾年唔緊要，問題係可能會執笠，我試過有咁嘅經歷，你覺得我嘥，但我次次都有食晒！
M：我親眼見過唔係。
細：我食唔晒都會打包！
M：打包後都食唔晒呢！
爭取睡眠懶卸妝
女人天生愛扮靚，但Mag和細細粒在女性中可謂最懶的一群！別看Mag擁有白皙無瑕的肌膚，以為她有獨門保養心得，原來她比細細粒更懶，Mag自爆拍劇曾攰到沒卸妝，被細細粒嘲笑：「點解個妝同尋日冇分別？」
細：有時拍劇夜晚接朝早，瞓得兩個鐘又要返去開工，有次我問林欣彤：「點解個妝同尋日冇分別？」佢話返去瞓咗冇落妝。
M：真係好攰，返去仲要洗面、落妝再化番妝，兩個鐘就冇咗，我寧願瞓一個鐘。
細：我唔會囉！點都落妝！
M：兩秒之後又化番！
細：個妝會Fresh啲。
M：其實我哋兩個都係好求其嘅人。
細：我盒面膜兩年前喺台灣買都未用完，哈哈！
M：我哋都係敏感性皮膚，唔敢亂用Skin care。
陳嘉佳20秒谷淚
Mag和細細粒雖然分別屬於音樂及演藝界，一個有歌喉、一個有演技，但她們都是出名的廿四孝女兒，同樣以養家為動力勤奮工作，細細粒揚言：「我哋冇辦法柔弱，因為要孭起頭家」，更即席示範二十秒內迅速谷出眼淚，望演感人戲。
細：我目標唔係好遠大，只要做好每份工作，自然會有人欣賞，介紹我做下一個工作，畀更多機會。
M：有啲人可能係有鬥心，但我哋係為養家。
細：養家係動力，Push自己更加努力工作。
M：如果要講最想挑戰嘅目標，我好想做一個令人安慰嘅演唱會。
細：我成日拍好多喜劇，但其實我想演智障嘅角色，拍感人嘅戲，因為我有個絕技係喊，喊完即刻抽離到，笑完又可以再喊過。
M：你好犀利！我諗（傷感回憶）到個胃抽筋都未喊到，有時想喊但又唔畀我喊，會忍唔住，我唔識精準地控制情緒。
細：其實我平時好少喊，我哋冇辦法柔弱同內向，因為要孭起頭家。反而你望落似柔弱，但遇到一啲認為啱嘅事，你會用好多理據去拗到底。
M：某程度上係逼自己外向，我唔係好識同人傾訴，好似我首新歌《奇怪》，骨子裏嘅我好內向，唔係好識同人交代。當要同朋友講番今日訪問嘅內容，我淨係講到大概嘅意思，唔可以逐隻字講番出嚟。
細：我都係得短暫記憶OK，所以最驚補拍，因為唔記得晒啲對白！
後記：輸咗唔認帳
Mag與細細粒平日絕不談工作，Mag笑言二人的話題十分無營養，尤其談論旅遊計劃時更是停滯不前，Mag說：「我哋拍劇嗰班話一齊去旅行，二月到依家都未約到，佢好茅！話猜包剪揼，每人代表一個地方，猜完又唔認帳！」細細粒聞言即說：「因為我最鍾意去東京同倫敦，你哋話去大阪，東京我熟路啲嘛！」結果沒人再討論下去，旅程仍在計劃的開端……
髮型：Ritz Lam@Hair Corner
場地：Toscana Restaurant & Bar
文：馮雪怡
攝：司徒國榮