10歲張瞻晒朱古力肌過張繼聰
歌手謝安琪（Kay）今年三月誕下女兒張靖後，一直深居簡出，最近她為準備復工而積極收身，前晚便與老公張繼聰及囝囝張瞻夜跑。事後張繼聰在社交網分享跑步照，並寫道：「夜跑，非常快樂，見人少少，着番件姣豬豬背心先。」
雖然張繼聰大騷麒麟臂，但不及囝囝吸睛！只得10歲的張瞻掀起上衣晒六舊腹肌，一眾網民紛紛讚好，笑指他「食朱古力大」而練成一排「朱古力」腹肌，又有人笑說兩父子可以表演「心口碎大石」。
飲食節制
張繼聰昨日接受電話訪問，提到囝囝擁有腹肌，他說：「其實我個仔唔係大隻，係瘦啫。咁啱佢比較鋼條身形，加上鍾意做運動（先有腹肌）。不過我覺得小朋友唔需要訓練肌肉，最緊要健康為主。我成日鼓勵小朋友做運動，因為依家小朋友多數鍾意玩電子產品，我本身冇咩所謂，但希望佢哋可以接觸世界同運動。」Kay亦說：「可能囝囝跟咗爸爸，喺飲食方面同樣好節制，又會做好多運動，所以腹肌就係咁嚟，好事嚟嘅。」
文：專案組