JW愛情價益男友攞正牌晒恩愛

歌手JW與連鎖化妝品店太子爺男友葉韋彤愈愛愈高調，最近在工作方面更拍住上合作，日前JW為男友公司代理的美容品牌YUMÉI拍廣告，Tarzan亦有到現場探班，為女友打氣！

素顏一樣靚

JW表示隨着年紀增長，慢慢學識保養，平日她較懶化妝，愛素顏出街，博別人認不出：「但都有人認得，冇嘢嘅，佢哋話影相我都會影，我坐遠啲囉！」問到男友是否覺得她素顏一樣靚？JW即搞笑問在場的Tarzan，他識做地說：「靚，梗係靚！」

提到與男友合作，JW冧爆表示看到男友在場，會笑得特別開心：「佢企咗喺度同我一齊影，我就已經好開心喇！（有冇收男友代言費？）係公司收佢酬勞，我哋特登畀平啲o架，我哋呢個係『愛情價』。」追問收幾位數？她說：「同佢都係想互相幫助，冇咩話特別講錢，老闆娘又好好，唔想因為我同Tarzan嘅關係而點樣，佢都好希望畀個好合理嘅價錢我哋，令我哋合作好開心。」

開騷獲支持

明年1月JW將首次登陸紅館開騷，問到可會叫男友贊助其個唱？JW坦言贊助方面交給公司負責接洽，她不會刻意這樣做：「其實我好記得Auntie、Uncle有同我講過好支持我嘅，一知我有紅館演唱會都戥我開心，好支持，有佢哋支持我嘅音樂已經好開心，唔需要特登有咩金錢上嘅贊助，佢哋嚟睇我都好開心o架！」

葉韋彤親自監場為JW打氣。

JW昨日出席跑步活動。

另外，JW昨日出席跑步活動時稱，平時會與男友一起做Gym及打乒乓波，做完運動後會去做腳底按摩。

文：音樂組