王浩信搭實蔡思貝：不要傷害同事

視帝陳豪及夏雨、視后田蕊妮、李司棋及米雪，昨晚率領黃宗澤、馬國明、王浩信、岑麗香、黃翠如等小生花旦齊集電視城出席《TVB 50周年 華麗轉身 邁步同行》台慶亮燈活動，兩位大姐級鄭裕玲及汪明荃站在最正中位置，兩旁分別由陳豪和馬國明傍實，凸顯地位。

夫妻明合體

早前因拍無綫劇《踩過界》而傳緋聞的王浩信與蔡思貝雙雙亮相，期間有講有笑，王浩信更大方搭她的膊頭。對於被指揸車到思貝家樓下，王浩信表示當日只是在該屋苑附近泊車開工，寄望外界不要再有報道傷害同事，更揚言欣賞思貝：「佢好用心，所以唔好因為拍劇傾得多而有所誤會。（太太誤會？）梗係唔會，過兩日我哋有活動先講。（緋聞會影響同太太心情？）太太知我哋係朋友，第一日拍都一齊研究劇本，話唔係Friend都冇人信。（因為呢件事避嫌？）唔需要，套套劇都要避點會拍得好。」據知，浩信與太太將於明日首度公開「合體」出席天水圍商場活動，屆時會大玩遊戲。

王浩信、蔡思貝	大合照時，陳豪和馬國明傍實站在正中位置的鄭裕玲及汪明荃身旁。	香香在新劇中罕有水着上陣。

思貝則澄清自己並非該屋苑住戶，當日只是在該處泊車，浩信聞言說：「你早講嘛！」思貝坦言為此感無奈，問到與浩信再見面會否尷尬？她說：「唔會，拍劇咁耐係好拍檔。（同陳自瑤熟唔熟？）拍過一套劇。（你好惹是非！）拍一套劇就會有，之前拍《踩》劇都有同張振朗傳過。（覺得好無辜？）我學習緊點同同事相處愉快之餘，而又冇緋聞。」

夏雨、黃宗澤、李司棋、米雪等為新劇宣傳。

森美、高海寧和黃心穎齊齊浸溫泉。

復辦EYT

而節目開始由台慶劇《溏心風暴3》、《老表，畢業喇！》、《誇世代》及《降魔的》演員出場，並播出劇集片花，當中以《溏》劇最為搶Fo，既有黃宗澤剝衫露點戲、亦有香香罕有穿泳衣露三吋事業線等鏡頭。胡鴻鈞在《降》劇則有露股鏡頭。《森美旅行團》播出片段時，森美「晒肌」與高海寧、黃心穎齊齊浸溫泉，兩位靚女則圍毛巾晒香肩。至於《誇》劇，則有陳豪與森美爆肌打拳、陳豪拖住森美扮HeHe等戲份，及後司儀汪明荃宣布下月將復辦EYT，有份參與的曾志偉亦有拍片支持。

文：影視組