洪朝豐疑患脷癌 交低身後事

前DJ洪朝豐患抑鬱狂躁症多年，近年靠藥物治療令病情受到控制，生活回復正軌，不過突然傳出他疑患脷癌的消息！昨日他接受本報專訪時，透露舌頭發炎逾一年，經治療後未有好轉，3個月前他在精神科醫生轉介下去看耳鼻喉專科：「條脷愈嚟愈痛，照鏡睇到有膿，範圍又唔係細，我覺得唔尋常！之後醫生幫我做切片檢查，兩個月前報告就話冇癌細胞，但係細胞病變嘅第二期，如果去到第三期就係癌病。」第一次切片檢查後，他的傷口愈合得很好，可是很快脷的傷口情況變差，被黃色的膿覆蓋：「醫生發現發炎嘅地方仲大咗，我都發現感染嘅範圍除咗脷底，同黐住脷底嘅部分牙肉外，脷面都開始痛，佢就建議我做第二次切片手術。」雖然10月16日才出報告，但他指已作最壞打算是脷癌。

驚痛又驚冇得食

問到可會驚死？洪朝豐坦言：「唔會！反正人都會死，我3個月後都58歲啦，又冇乜嘢未做過，生活閱歷都幾多，留戀嘅地方都會有，係愛囉，包括親人同朋友。」又指反而最驚痛及不能進食：「我依家食軟嘅嘢都痛，如果成條脷都發炎點食嘢呢？如果冇得醫，去到最後又會好辛苦。」不過他表示不會「睇唔開」：「我唔會自殺。」

最唔捨得個仔

他謂已向身在英國的兒子交低身後事，稍後會去立遺囑：「當你同個仔講呢啲嘢嘅時候好怪異，但佢好尊重我所有決定，佢表面好冷靜，但都傷心嘅。我都有同佢講，假設有日我離開呢個世界，我最唔捨得嘅就係佢，佢係我最親嘅人。（有咩想同佢講？）三個字，『我愛你』，平時好少機會講。」他亦指希望在病情惡化之前，可以重返做電台DJ，以自己的人生閱歷幫助他人：「我唔知我把聲仲可以維持幾耐，趁我仲有一把靚聲，點解唔發揮吓佢。」

文：音樂組

攝：劉斌