歐陽震華帶挈拍檔嫁得好

賭王孫女粉絲變老婆

近排王祖藍首洗腦歌《咖喱魚蛋》個個狂Loop，Bobby都唔輸蝕，呢排喺廣告度唱爆「鮑魚」！其實早喺上年無綫劇集《一屋老友記》度，已經有人留意到佢同其他主角喺屋企打邊爐嘅戲，出動咗鮑魚、虎蝦、桶蠔等真富貴食材！相反，同劇嘅臨時演員只可以「聞」道具麵嚟扮食。茄喱啡Bobby都做過，佢仲自爆當年喺藝訓班係最醜樣，因為有學員唔撈，佢先至有機會簽無綫，佢話：「不知演過幾多『老笠』，試過笠絲襪『打劫』金行，衝出嚟遇到真警察，佢哋準備掹槍！呢啲演出全部都係預我，冇嘅，我做得好、逼真嘛！」唔只識得苦中作樂，Bobby仲好似佢喺鮑魚廣告話齋：「有Heart、有Substance！」有料到使乜驚！

想食鮑魚多過想啃道具麵嘅Bobby終於傻人有傻福，被以「高大靚仔」嚟形容佢嘅監製鄧特希揀中拍《皇庭》，紮上一線小生，仲同陶大宇、蘇永康同駱應鈞成為《皇庭》四虎，Bobby更加長做長有，成為收視同吸金保證！身為元祖級師奶殺手嘅佢仲「福射」旺埋「另一半」，Part過嘅花旦關詠荷、蔡少芬等都有幸福歸宿，唔怪得Bobby得戚話：「同我合作過嘅都嫁得好！」

《皇庭》劇唔止令Bobby名利雙收，仲帶嚟一段美好姻緣！佢老婆即係賭王傅老榕孫女傅潔嫻，就係「余在春」嘅粉絲，都話男人有才華，條路就易行，因緣際會雙方一見鍾情，所謂難得有情人，搵到個互相欣賞嘅伴侶，呢份福氣真係幾生修到！

「有啱先搵你」唔嬲就假

Bobby福氣仲大到一個點，試過食麻辣火鍋，飽到胃酸倒流，入咗氣管，差啲做植物人，好在及時送入ICU，逢凶化吉！試問咁旺嘅福將，你唔出動八人大轎請佢返嚟旺吓自己，都已經笨，邊有人仲會主動趕走財神？就係有！早兩年有人同Bobby傾續約，爆咗句「有啱先搵你」，係難怪Bobby嬲嘅！你估家陣人哋冇錢開飯咩，一年拍一個劇，純粹係忠心Bobby嘅TVB情意結咋！Bobby有花名你叫──「貨櫃」！笑料裝滿成個貨櫃，夠你拍十齣台慶劇有餘！

或者Bobby都係時候加多個花名叫「茶漬」，因為呢個世界真係有人寶就當草，竟然會走去刮走紫砂茶壺嗰浸茶漬，就係咁樣一刮，唔識貨嘅人係永遠唔知自己倒咗幾多貨櫃嘅錢出街！

Nuts哥