草蜢朋友太多 錄歌受阻

組合草蜢前晚現身將軍澳電視城,為薛家燕及曹永廉等主持的節目《流行經典50年》錄影最後一集,薛家燕以低胸裝亮相,笑言為了最後一集「賣大包」:「當初話做四集,做到依家廿九集,大家合作無間,亦多謝家庭觀眾支持!」

草蜢將於11月舉行演唱會,他們透露會在節目中大唱經典歌做熱身。提到蔡一智早前在林敏驄演唱會因塌台意外受傷,可會留有陰影?他笑說:「冇陰影,好期待演唱會,嗰度跌低就喺嗰度企番起身!」他們又透露最近正為演唱會新歌錄音,但因為有太多朋友探班令進度受阻:「有好多朋友嚟探班,佢哋好想聽新歌,張智霖、袁詠儀、古天樂、伍詠薇、周汶錡等,令到首歌要分開錄,唔緊要,慢工出細貨。」