克勤仙人掌贈阿倫一柱擎天但係開叉？
歌手李克勤假紅館舉行一連九場的《李克勤慶祝成立30週年演唱會》前晚圓滿落幕，尾場由校長譚詠麟（阿倫）擔任嘉賓，克勤特意送上仙人掌，並開玩笑：「係代表你一柱擎天……嘅樂壇地位！」阿倫即笑說：「但佢又開叉，又爛晒咁喎！」之後一度忘詞的克勤拖阿倫落水，笑言被傳染：「我有次問嗰個人點解成日唔記得歌詞，佢話『你得一、兩首金曲梗係記得，我有咁多首金曲，邊記得晒咁多！』」
明年執導筒
此外，台上談到追尋夢想時，克勤笑說：「如果冇夢想，你就係一條粉腸！」並自爆明年將挑戰做電影導演，並已得到老闆楊受成支持：「如果真係我朋友同Fans嘅，唔好理我拍成點，都買飛入嚟睇得唔得？一場演唱會萬幾人，每人都入場就有百幾萬票房，我有9場演唱會，咁楊生就唔會蝕！」而唱出最後一首歌時，他被歌迷的手機燈海感動，多次唱不下去及落淚，場面感人。
慶功宴上，克勤透露完騷後會開始組織電影班底，他將參與劇本創作，希望拍攝一套富香港特色的溫馨愛情小品。提到角色人選，他表示仍未決定，坦言想專注做導演所以不會主演，亦不會邀請太太盧淑儀客串。
文：音樂組