蔡瀚億放「催淚彈」準備登陸
加入影壇5年的蔡瀚億（Babyjohn）今年上半年有六部作品上映，總票房錄得逾半億港元，是入行以來最好成績，更憑此打開內地市場！Babyjohn喜出望外，承諾往後日子演出會更嚴謹，望有機會返內地拍劇！
影壇新貴Babyjohn早前在新戲飾演警察被炸死一幕，令內地觀眾感動流淚，更為他起了新朵「催淚瀚」。
對於盲舂舂打開內地市場，Babyjohn直言始料不及：「真係好多謝啲電影公司老闆好大膽畀我嘗試，好似之前另一部電影仲做埋男主角。其實拍過廿部戲，每部角色都唔同，挑戰性愈來愈大，希望不負眾望啦！（挑選劇本會更嚴謹？）會喺演出上要求更嚴謹！」
與葉德嫻鬥戲
Babyjohn表示稍後尚有一部電影及劇集準備面世，同時亦有一部內地劇斟洽中：「當然電影會繼續，內地劇真係想試，最近睇完《羋月傳》好欣賞孫儷，套劇製作認真，佢哋用電影拍攝手法，細膩到令人好自然代入角色，所以有機會梗係想試。」
至於近日與許鞍華導演合作的新片，Babyjohn笑指有幸與影后周迅及葉德嫻演對手戲，親身感受強勁「戲」場，他說：「我會好靜咁喺佢哋身邊感受。導演係我未入行前已經好想合作，覺得佢拍嘅嘢好另類，一日拍半場戲，準備好晒先拍，一切用感受行先。觸感細到連個鐘秒針郁嘅聲都聽到，跟住佢就開始拍，大家啲戲會湧出嚟，一、兩Take就收貨。」
睇中醫等生B
提到已婚4年，可有計劃生小朋友？Babyjohn坦言順其自然，若上天給予禮物不會抗拒：「有小朋友就叫圓滿家庭，不過自從入行拍電影後，瞓覺時間唔穩定，身體差咗好多，所以除咗睇中醫調理，都會做埋運動配合。」
文：影視組
攝：秦健輝
場地：粵桂樓
髮型：Domanic Tao @ The Attic Hong Kong
化妝：Winki Tsang