江若琳獲男友「包起」冧番晒

歌手江若琳（Elanne）及狄易達昨日出席活動，以露腰裝弗爆現身的Elanne原來早前感染手足口病，以致消瘦不少，她說：「都慘呀，我病咗成個星期，啱啱好番，唔知食錯啲咩，發燒發到40度，入咗醫院，喉嚨仲潰爛咗，完全食唔到嘢，瘦咗5磅！」她指男友「生煎包王」蕭潤邦亦有陪伴及照顧她：「佢都瘦咗，不斷陪我睇醫生，依家啲醫院排隊要幾個鐘，我哋要不斷穿梭港九去搵唔使排嘅醫院。」

預告個唱騷馬甲線

而Elanne將於9月9至10日假九展開騷，問到可會邀請男友當嘉賓？她表示不會，但對方兩晚都會來捧場，更提供食物贊助：「佢會贊助兩日台前幕後嘅飯盒，餵飽大家！」她表示現時為個唱要積極keep fit，所以每日健身、踩單車及潛水，又搞爛Gag指自己有首歌叫《Show You》，所以屆時亦會「騷腰」：「7年前演唱會我有騷一排腹肌，今次都要，啲馬甲線、人魚線要出吓嚟，唔係點同觀眾交代！」問到男友會否陪她健身或逼她食包？她笑說：「我再唔減就成個包咁！啲朋友成日要我帶佢哋去食包，我一個星期去四次。」

江若琳冧爆表示抱恙期間獲蕭潤邦細心照顧。

狄易達（中）即場獻唱晒「舞」功。

狄易達投資六位數搞騷

至於狄易達表示最近除了開設室內設計配對平台外，亦首次投資六位數於中環海濱舉辦一個演出活動，心情非常緊張。

文：音樂組

攝：司徒國榮