老婆「孕」味濃翹實出巡 BabyJohn準備湊Baby？
近年片約不斷的男星蔡瀚億（BabyJohn），與太太Donut結婚四年，早前曾表示已有共識生小朋友。日前兩公婆拍拖到中環行街，Donut明顯發福不少，肚凸凸的她，全程翹着老公又頻撫肚皮，步伐緩慢，孕味甚濃！
現年30歲的BabyJohn，年前由舞台劇演員跳入電影圈，初踏影壇即在電影頒獎禮奪得新演員獎，演技備受認同。初入行時，雖然他被爆與拍拖七年的女友Donut秘密結婚，但未有影響其演藝事業，近年電影一套接一套，票房亦不俗，可稱得上是影壇搶手貨。
招牌金髮變黑頻摸肚
日前下午5時，戴帽、穿白Tee的BabyJohn與太太Donut現身中環，其妻體形明顯較以前圓潤不少，即使穿上鬆身間條衫，亦難掩其肚凸凸的身段。當日Donut腳踏波鞋，全程翹實老公手臂，步伐緩慢地一步一步行，以往染上一頭金髮的她，當日所見已變回黑髮，加上頻頻撫肚皮，孕味甚濃。等過馬路時，有途人認出BabyJohn兼眼望望，但他未有理會，繼續細心地翹住太太，兩公婆慢慢行到附近停車場取車，之後由BabyJohn做柴可夫載太太離開。
文、攝：追蹤組