歷盡喪母高山症胃酸倒流之痛 陳法蓉爬出谷底

貴為1989年度港姐冠軍的陳法蓉美貌與智慧並重，自出道以來星途尚算順暢，近日在無綫新劇《賭城群英會》中與陳百祥（叻哥）上演「世紀人工呼吸」，迅即成為全城熱話，令她人氣再度急升。雖然事業上再遇第二春，但感情上卻「守Dry」八年！單身的陳法蓉日前被拍得於將軍澳完成工作後，駕車載女友人直駛尖沙咀，其後女友人落車，她便獨自走進一家商場搵食，最後選擇食「落寞壽司」！一小時後，陳法蓉拿着一袋衫去還，期間不苟言笑，直到還衫時才展露笑容，跟店員有傾有講，最後獨自閒逛半小時後才駕車回家。

否認冇人要：係唔啱我

眼見好友蔡少芬與朱茵皆已作人妻兼人母，陳法蓉近八年來竟沒有拖拍，還要落寞「食自己」，難怪令人擔心「冇人要」，但她受訪時表明戀愛法規，只是寧缺勿濫而非「守Dry」：「點解要話我冇人要呢？其實係一直有人想要，但嗰啲人真係唔啱我啫！我對戀愛仍然好有憧憬，一定唔會收兵，要好鍾意先會開始一段關係。我經理人試過喺屋企睇有關『盛女』嘅節目，睇睇吓佢會話：『呢個咪你囉！』我覺得只要兩個人相愛，工作忙唔見面係藉口，愛裏面一定要包容同遷就，而我仲好相信愛情。」

陳法蓉一個人閒逛商場，冇仔陪神情落寞。

陳法蓉獨自去食壽司，拿起餐牌落Order。

「火燒心」狂嘔 唔會斷尾

女人當自強，單身也可以很快樂，情路坎坷的陳法蓉同時卻要面對身心折磨！2009年，她突然受胃液倒流影響，身體稍一操勞便會「火燒心」兼狂嘔，加上當年轉換經理人公司需時適應，故當時決定往後只接簡單登台及廣告工作，直到去年才接拍《賭》劇。談到胃病問題，陳法蓉坦言不會「斷尾」﹕「只要唔太操勞、唔係長時間冇嘢落肚就冇問題。拍《賭》劇唔使擔心冇美食，正所謂『有叻哥冇肚餓』，片場出現過由香港專程運上深圳場地、新鮮熱辣嘅『好西』，只係拍攝中途遇上媽咪辭世，對我嚟講打擊都幾大！我試過心情好差匿埋喊……諗番轉頭其實去年都幾黑仔，喺西藏開工又試過有高山反應！」

身體及精神漸漸康復的陳法蓉近日「再下一城」，與余文樂等到沙漠取景拍戲：「嗰度天氣變幻莫測，試過龍捲風，亦因大風沙關係，收工返酒店沖涼，沖咗好耐都仲係成地沙，但都係一次唔錯嘅經驗！」

陳法蓉雖有女友人陪伴，但全程心事重重。	陳法蓉雖受胃液倒流折磨八年兼冇斷尾，但她依然輕鬆面對。	陳法蓉與陳百祥上演「世紀人工呼吸」，備受關注。

採：影視組

文：專案組

攝：追蹤組