洗腳禮寓意不離不棄 王君馨笑老公「硬晒」有心無力
王君馨前日雖為補辦婚宴忙足全日，但精力爆燈的她散席後孖老公與朋友直落打邊爐兼夜蒲暢飲！她昨日出席活動時大爆老公提早投降返歸，更笑對方「有心無力」兼「硬晒軚」！而姊妹之一岑麗香則指「洗腳禮」最為感動！
藝人王君馨（Grace）前日在大潭美國會補辦婚宴後，晚上與老公Daniel手拖手拉隊到銅鑼灣打邊爐醫肚，之後更與一眾好友夜蒲暢飲。忙足全日的她，同友人玩到四點半至肯返歸，但昨日仍為無綫開工，宣傳新劇《超時空男臣》。
婚禮多催淚位
問到婚宴後老公有否送驚喜？Grace即大爆對方「有心無力」：「佢應該兩點就返咗屋企，我返到去佢已經喺梳化瞓着咗，我叫佢去沖涼先瞓，所以我諗佢都冇晒力。」又指對方全日維持笑容，搞到面部肌肉硬晒，自己塊面亦因保持笑容而幾乎抽筋。
雖然她昨日在活動上取笑老公，但其實兩口子在婚宴上互相製造大量感動位，令對方流淚。除了進場時為老公獻唱外，Grace更與老公互相洗腳，寓意不離不棄，到Daniel為她行「洗腳禮」時，君馨即忍不住喜極而泣，場面感人。
而姊妹團之一的衛蘭向一對新人唱出英文情歌，令他們一路聽一路喊；同屬姊妹團的岑麗香則表示「洗腳禮」最為感動：「從佢哋嘅眼神感受到對對方嘅愛！」苟芸慧則表示很榮幸可以做姊妹，自己亦感動到喊。至於與男友林師傑到賀的歐陽巧瑩就指向新人獻花時，Grace對她說：「期待你哋嗰日嘅來臨。」
文：影視組