考試講意頭 朱千雪100分秘笈食腸蛋麵攞Luck

藝人朱千雪、龔嘉欣、羅力威、周志康與新鴻基地產代理租務副總經理孫雅茵前晚在V city出席「DSE放榜加油派對」，期間與現場觀眾進行問答環節，大玩遊戲。正修讀法律博士課程的朱千雪自言以前讀書成績不算太叻，但家人也沒給予太大壓力，印象最深是每次考試前夕，母親總會為她準備腸蛋麵，她笑說：「一條腸、兩隻蛋，攞100分意頭，每科都食一次，所以中學時有啲肥，但就算依家考試，媽咪都一樣會幫我準備。（選港姐有冇食？）冇，再食就一定冇獎。（食完媽咪愛心麵科科考100分？）某啲科目真係滿分，媽咪呢個舉動好窩心。」

龔嘉欣曬燶肌膚

龔嘉欣穿上喱士透視大露背裝兼騷長腿，十分養眼，但她自爆拍攝無綫新劇《誇世代》外景時曬燶皮膚，她笑說：「除咗腰下嘅位置，其餘部分都曬燶晒，所以要着衫遮住，相信要一年半載先好，因為我好難白番。前幾日着背心出席活動，畀人見到甩晒皮一撻撻，人哋以為有啲乜嘢喺度。」為了盡快復原，她進行了特別的美白療程，笑說：「要除晒啲衫，將啲Mask擺喺背脊度，咁就好啲！」她又透露近日在big big channel拍片教煮食，網民反應好，故公司希望她每星期拍一條片放上網。

朱千雪（左起）、周志康、新鴻基地產代理租務副總經理孫雅茵、龔嘉欣和羅力威為學生打氣。	龔嘉欣（左）和朱千雪鬥踩爆氣球。	龔嘉欣以性感露背裝亮相。

羅力威走堂去彈琴

至於羅力威玩遊戲時不斷搞爛Gag，問到在女友雨僑面前是否也是這樣？他笑說：「冇，不過呢一面幾近我本人，今日好開心有機會同朱千雪一齊做嘢。（唔驚女友扭耳仔？）唔怕，好難得同咁靚嘅女仔出席活動同玩遊戲，係我嘅榮幸。」在新西蘭讀書的他自言求學時很Hea，他沒有經歷過會考，故想像不到香港學生的讀書壓力，又自爆會走堂去彈琴。

文：影視組