馬德鐘擲百萬再搞食肆
近年頻頻在內地賺人仔的馬德鐘，近月返港及重返「娘家」無綫拍劇，在港一邊拍劇、一邊爭取時間搞生意，下月將連開兩間食肆，誓要打造飲食王國。
馬德鐘自約滿無綫後，便北上搵銀，在內地劇接劇的他，近月重返無綫接拍《跳躍生命線》，問到重返娘家有何感受，他說：「冇話重唔重返嘅，其實係故事劇本好，近年都喺內地拍劇，如果喺香港，想拍啲香港特色嘅劇，呢部係話消防救護員，好有香港特色，傾過之後覺得幾有興趣，咁咪拍囉！同埋收到好多意見，香港觀眾覺得好耐冇見到我，大陸拍嘅劇又好少喺香港播，自己都想同香港觀眾見吓面。」以往經常做飛機師或警察角色的他，今次飾演救護隊目，將再以制服造型上陣。
親力親為換埋燈泡
分身有術的馬德鐘，早前試完造型便趕往黃埔，為下月開張的蠔吧和酒窖執裝修，繼早年與家人在尖沙咀合資經營日本餐廳後，他再投資七位數開蠔吧和酒窖，他表示一向喜歡食生嘢，曾試過一口氣吞掉十隻生蠔，視生意如親骨肉的他，笑言現在似多了三個仔：「做飲食真係困難嘅，但又好似上咗癮，自己奄尖要求高，事事要親力親為都辛苦。」期間，他突然變身「裝修師傅」，一時裝燈泡，一時又爬高執假天花，親自整到滿意為止。
20顆乳齒賀仔生日
另外，馬德鐘與太太張筱蘭前日為兒子馬在驤慶祝19歲生日，張筱蘭送上一棚牙做禮，她說：「沒有華麗的包裝，沒有豪華的晚宴，只是一家人齊齊整整享用一頓簡簡單單的晚飯，與馬德鐘一起拉拉小提琴，享受一下親子樂，一起懷緬你的成長時，為你保存得完完整整的20顆乳齒，希望你喜歡這份另類的生日禮物！」
文：名人組