金剛拍住祖藍賺人仔
藝人金剛與無綫合作多年，他由TVBS主持開始做起，曾主持《超級無敵獎門人》以半鹹淡廣東話成功出位，又參演過多套劇集如《愛情食物鏈》、《迷》及《降魔的番外篇—首部曲》等，還有與阮小儀合作的《街坊廚神》，不過，金剛原來於6月中已跟無綫約滿，並轉投王祖藍工作室成為旗下藝人。
孝順仔陪父母
目前金剛已搬返台灣居住，有工作時才中、港、台「三撈」，昨日他接受訪問時坦承已跟祖藍簽約，亦計劃與友人在台灣開娛樂公司：「我返台灣住，係想多啲時間陪屋企人，始終父母都年紀大。（你簽祖藍想賺多啲人仔？）祖藍話我哋一齊喺內地發展，賺乜都好啦，總之係錢就得！」至於好拍檔阮小儀，金剛笑言：「我依家周圍飛啫，係冇腳嘅雀仔嘛！不過我唔係死咗，都會好掛住小儀，之後一樣可以合作。」他坦言人長大了，是時候往外闖：「我同無綫係和平分手o架嘛，搵到我一定再合作。」
當林欣彤搖錢樹
此外，祖藍昨日與旗下歌手林欣彤（Mag）到電台宣傳新歌《奇怪》，Mag於年底舉行演唱會，正物色場地，祖藍搞笑說：「想Mag開半場，剩低半場由我包辦。（投資好多錢喺Mag身上？）佢冇蝕錢o架！係我搖港幣嘅搖錢樹。」
文：影視組